Март 6-да Москвага, Россия Федерациязының Президентизиниң Сибирь федералдыг округда бүрүн эргелиг төлээзи Анатолий Серышев биле Федералдыг казначействонуң начальниги Роман Артюхинниң аразында ажылчын ужуражылга болуп эрткен.
Россия Федерациязының бюджет системазының бюджет күүселдезиниң айтырыглары, тускай сорулгалыг акша-хөреңгиниң казна үделгези болгаш казна төлевирлериниң системазында бюджет мониторингизиниң айтырыглары сайгарылганың кол темалары болган. Роман Артюхин 2024 чылда казначейство чаңгыс аай агар санында арткан 15 ажыг млрд. рубльди, а 2025 чылда 6 млрд. рубльди Сибирь федералдыг округтуң субъектилериниң бюджет орулгазынче эргелелден кииргенин демдеглээн.
Россия Федерациязының бюджет системазының бюджеттер күүселдезин организастаарынга, ол ышкаш национал төлевилелдер боттандырылгазының саң-хөө-бюджет чорудуунда база садыглажылга адырында контрольду чорударынга Федералдыг казначейство болгаш ооң девискээр органнары кол рольду ойнап турарын Анатолий Серышев онзалап демдеглээн.
Оон аңгыда, ооң бодалы-биле алырга, казначейство үделгезиниң тургустунган системазы бюджет акша-хөреңгизиниң шимчээшкинин мөөңнеттинген аайы-биле саң-хөөге хайгааралды чорудуп, дес-дараалаштыр контрольдаарының эң чугула кезээ болуп, Россия Федерациязының Президентизиниң шиитпирлерин күүседиринге чогумчалыг байдалды тургузуп турар.
Ужуражылганың төнчүзүнде Роман Артюхин биле Анатолий Серышев үре-түңнелдиг кады ажылдажылга дээш бот-боттарынга четтиргенин илередип, моон-даа соңгаар демниг хөделири чугула дээрзин онзалап демдеглээннер.
Федералдыг казначейство — Россияның хоойлужудулгазы езугаар федералдыг бюджеттиң күүселдезин, чурттуң бюджет системазының бюджеттер күүселдезинге касса ажыл-чорудулгазын хандырарынга эрге-хоойлу камгалаар ажылды күүседип, федералдыг бюджет акша-хөреңгизиниң кол үлекчизи, федералдыг бюджет акшаландырыышкыннарының алыкчыларының баш бурунгаар болгаш амгы үеде операциялар чорудуун контрольдаар федералдыг күүсекчи эрге-чагырга органы болур. Россияның казначействозу ниити күрүне хемчээлдиг национал төлевилелдерни боттандырарынче көрдүнген акша-хөреңгини хайгаарап, күрүне эрге-хоойлу тургузугларының саң-хөө ажыл-чорудулгазының талазы-биле чаңгыс аай учет, контроль болгаш информация системазы болуп турар.