Март 7-де, Тываның В.Көк-оол аттыг национал хөгжүм-шии театрынга Бүгү-делегейниң херээженнер хүнү Март 8-ке тураскааткан байырлыг хурал болган.
Аңаа ТР-ниң Баштыңы Владислав Ховалыг болгаш ТР-ниң Дээди Хуралының даргазы Каң-оол Даваа база өске-даа удуртукчулар киришкен. Тываның кожууннарында болгаш хоорайларында төрээн чериниң хөгжүлдези дээш, бүгү күжүн үндүрүп ажылдап чоруур херээжен чон көрүкчүлер залын долдур олурупкан. ТР-ниң Баштыңы Бүгү-делегейниң херээженнер хүнү Март 8-биле байыр чедиргеш, күрүне шаңналдарын тывыскан.
РФ-тиң Президентизиниң Чарлыы-биле, Ада-чурттуң Улуг дайынының хоочуннары Валентина Голышевага, Кандан Моңгушка, Мария Шешинага «Тиилелгениң 80 чылы» медальдарны тывыскан.
РФ-тиң кадык камгалалынга хөй чылдарда үре-түңнелдиг күш-ажылы дээш, «Республиканың консультатив-диагностиктиг төвүнүң» кадрлар даргазы Саяна Сегбелдейни, улуг эмчиниң экономика талазы-биле оралакчызы Аида Топчени РФ-тиң Президентизиниң Өөрүп четтириишкининиң бижии-биле шаңнаан.
РФ-тиң камгалал сайыдының дужаалын езугаар «Тускай шериг операциязының киржикчизинге» деп Россияның Камгалал яамызының медалын Чөөн-Хемчик кожууннуң төп эмнелгезиниң хирургия салбырының медицина сестразы Алдынай Монгушка тывыскан.
Таңды кожууннуң Дүрген сумузунуң «Женсовет» волонтержу пунктунуң удуртукчузу Чодураа Оюнга, Чеди-Хөлдүң «Мөңгүн волонтерлар» волонтержу пунктузунуң удуртукчузу Урана Моңгушка, Өвүр кожууннуң Хандагайты сумузунда «Чечек» уруглар садының кижизидикчи башкызы Ай-кыс Моңгушка, Тыва Республикада шииткел күүселдезиниң Федералдыг албанының эргелелиниң кеземче системазында кижиниң эргелерин сагыырының талазы-биле бөлүктүң улуг инспектору, иштики албанның майору Анастасия Мищенкога, «Водоканал-Сервис» кызыгаарлаттынган харыысалгалыг ниитилелдиң 3-кү категорияның канализация участогунуң оператору Надежда Чебокчиновага Тыва Республиканың Баштыңының Өөрүп четтириишкин бижиин тывыскан.
Чуртталга-коммунал ажыл-агыйынга хөй чылдарда ак сеткилдиг ажылдааны дээш, Шагаан-Арыг хоорайда "Алды-Шынаа" муниципалдыг унитарлыг бүдүрүлгениң суг хандырылга участогунуң насос оператору Степанида Нарылковага Тыва Республиканың Баштыңының хүндүлел бижиин тывыскан.
Кызыл кожууннуң Шамбалыг ортумак школазының педагог-библиотекары Чечек Моңгуш, Шагаан-Арыг хоорайның 2 дугаар школазының математика башкызы Рада Кыргыс оларга «Тыва Республиканың өөредилгезиниң алдарлыг ажылдакчызы» деп атты тывыскан.
Хөй чылдарда арга-арыг ажыл-агыйынга ак сеткилдиг ажылдааны дээш «Күрүнениң бойдус курлавыры» федералдыг күрүнениң бюджеттиг албан чериниң эртем ажылдакчызы Нина Молоковага «ТР-ниң алдарлыг ажылдакчызы» деп атты тывыскан.