Эргим хүндүлүг херээженнер!
Бүгү-делегейниң херээженнер хүнү Март 8-биле силерге сагыш-сеткилимниң ханызындан изиг байырны чедирип тур мен!
Силерниң сагыш-сеткилиңерниң чылыы, тура-сорууңарның күштүү, төрээн Тывавыстың хөгжүлдезинге киирген үлүүңер, дуза херек кижилерге деткимчеңер херээжен кижилерниң буянныг мөзү-шынарының херечизи-дир. Силер чоннуң эң үнелиг ёзу-чаңчылдарының кадагалакчылары, чоннуң идегелдиг чөленгиижи, эң чаагай бүгү-ле чүүлдерниң дазылы, чылыг-чымчак аажы-чаңныг болгаш чараш арын-шырайлыг авалар силер.
Идепкейлиг хамааты туружуңар, бистиң Тывавыска ынакшылыңар, чуртувусту улам чечектелдирип хөгжүдеринче чүткүлүңер дээш өөрүп четтирдим.
Бо часкы хүн Силерге чырык-чылыг хүлүмзүрүглерни, өөрүшкүнү, чоок кижилериңерниң кичээнгейин, аас-кежикти шаңнаар болзун!
Хүндүткел-биле, Тываның Баштыңы Владислав Ховалыг.