Тыва Республикада тускай шериг операциязының киржикчилеринге “Тываның маадырлары” деп чаа кадрлар төлевилели ажылын эгелээн. Бөгүн Героитувы.рф (героитувы.рф/) деп аттыг сайт албан езузу-биле ажылдап эгелээн, аңаа кандыг-даа кижи программаның дугайында долу медээлерни тып ап, эң-не кол чүүл - аңаа киржир дугайында билдириишкинни киирип болур.
«Тываның маадырлары» дээрге, Владимир Путинниң эрткен чылын чарлаан «Маадырларның үези» деп президентиниң кадрлар программазының регионалдыг хевири болур. Тываның Баштыңы Владислав Ховалыг регионалдыг программаның эгелээрин республиканың Дээди Хуралынга Айыткалынга дыңнаткан. Ооң чугаазы-биле алырга, тускай шериг операциязының киржикчилерин болгаш хоочуннарын деткип, оларга чаа сорулгаларны тыварынга, боттарының арга-шинээн ажыдарынга дузалажыры – кол сорулга.
Регионалдыг эгелээшкинниң кол ылгалы болза, федералдыг программада тургусканы дег, дээди эртемниг шериг албанныглар база өөредир аргалыг. Ынаар ортумак тускай эртемниг дайынчыларны база хаара тудар. «Чүгле республика болгаш муниципалдыг деңнелдерде удуртукчуларны эвес, а даг бүдүрүлгелеринге болгаш экономиканың өске-даа адырларынга ажылдаар арга-дуржулгалыг специалистерни белеткээр бис» – деп, Владислав Ховалыг демдеглээн.
«Тываның маадырлары» төлевилелинче шилиттингеннер “Күрүне эргелеп-башкарылгазының дээди школазы” (ВШГУ РАНХиГС) институду-биле Тываның күрүне университединге профессионал эде белеткелдиң өөредилге программазынга өөренир. Төлевилелдиң киржикчилери өөредилгезин доозупкаш, профессионал эде белеткелдиң дипломун алыр.
Республиканың чазаа бо хүннерде регионалдыг программа күүселдези-биле өөренир күзелдиг хамаатыларны шилиириниң чурумун бадылаан. Документиде айытканы езугаар, шилилге ийи чадага эртер.
Бирги чадада – төлевилелдиң албан езузунуң сайтызынга бүрүткедир. Бүрүткел үезинде хууда кабинетти тургузуп, анкетаны долдуруп, бадыткал документилерниң электроннуг бижиктерин кожуп, чогаадыгны бижиир. Амгы ТШО зоназында тулчуп турар шериг албанныгларга тускай хүннерни аңгылаан.
Ийиги чадада – айтырыгларга харыылаар. Ону онлайн арга-биле эрттирер, бир эвес киржикчиниң техниктиг аргалары чок болза, тускай шериг операциязының киржикчилерин деткиир «Ада-чурттуң камгалакчылары» күрүне фондузунуң Тыва Республикада салбырынга тестилерни дужаап болур. ТШО зоназында шериг албанныг кижилер хууда кабинединге онлайн айтырыг-харыыларны эртип шыдавазын дыңнадырын айыткан.
Бүрүткеткеш, шылгалданы эрткен соонда, немелде шылгалда кылдыр чугаалажылганы эртер чадавас. Удуртуп-башкарар арга-дуржулгазы, арга-шинээ болгаш шериг ачы-хавыяазы эки түңнелдерлиг киржикчилерни өөредилгеге чалаар.
Владислав Ховалыг парламент депутаттарынга бодунуң Айыткалын берип тура, ТШО шериг албанныгларынга чаа өөредилге төлевилелин эгелээрин дыңнадып, күүсекчи эрге-чагырга органнарынга элээн каш даалгаларны бергенин сагындыраал. Ылаңгыя, регионнуң Өөредилге яамызынга тускай квота езугаар профессионал эртем чок ТШО хоочуннарын халас өөредирин дааскан. Күш-ажыл болгаш социал политика яамызы “Россияда ажыл” деп федералдыг программаның күүселдези-биле,тускай операция хоочуннарынга тускай үделгени организастаар. Регионнуң баштыңы шупту күрүне программаларының шугуму-биле бо чылын тускай операция киржикчилерин ажылга хаара тударынче кичээнгейни улам күштелдирерин демдеглээн.