“Хандагайты” эрттирилге пунктузунуң каайлы инфраструктуразының эде чаартылга ажылдары доостур чоокшулааны-биле, Тыва таварты Моолче транспорт болгаш чүък сөөртүлгези 1,5 катап көвүдээн.
Марттың 5-те республиканың Баштыңы Владислав Ховалыг ажыл-агый аайы-биле Тывага келген Россияның Федералдыг каайлы албанының Красноярск каайлы эргелелиниң начальниги Василий Костомаров ужуражып турда, ооң дугайында медээни дыңнаткан.
2023 чылга деңнээрге, 2024 чылда кижилер 18 хуу хөйге база транспорт 19 хуу хөйге эрттирилге пунктузун эрткен. 2023 чылда хүнде ортумаа-биле 113 машина болгаш 347 кижи эртип турган болза, бо хүнде ортумаа-биле 130-140 машина болгаш 450 кижи чедип турар. Өскээр чугаалаарга, “Хандагайты” эрттирилге пунктузу чаартылга ажылдарының соонда, хүнде 200 машина болгаш 560 кижини эрттирер апаар.
Амгы үеде Өвүрнүң автомобиль контроль-эрттирилге пунктузу ийи талалыг чурумда ажылдап турар, азы ону чүгле Моолдуң болгаш Россияның хамаатылары эртип болур. Чаартылга доозулган соонда, аңаа өске-даа чурттардан кижилер болгаш чүъктер эрттиреринге орук ажык апаар. Ынчан тыва транзит баш бурунгаар санаан хемчээлдерни белени-биле каш катап ажа бээринге Владислав Ховалыг бүзүрелдиг.
Республиканың Баштыңы Тываның кызыгаарлар аразының оруунга хереглелди эрттирилге күчүзүнүң улгатканы-биле тайылбырлап турар.
Хандагайты таварты ийи талаже чүък сөөртүп турар улуска чиигелделерни Тыва база берген. Россияның чазаа-биле дугуржулга езугаар эрттирилге пунктузунуң чоогунга чурттакчыларга ачы-дуза чедирер тускай экономиктиг зонаны тудар.
Садыг-саарылга оруун ажыдарынга Моол база сонуургалдыг болгаш, кожа турар “Боршо” эрттирилге пунктузунуң чанын база хөгжүдүп турар. Кызыгаарның ийи талазында транзиттиг чурттарга ачы-дуза инфраструктуразын – оруктар, складтар, орук кыдыында ачы-дуза комплекстери, заправкалар, аалчылар бажыңнарын тудуп турар.
Республиканың Баштыңы Тываны таварты Моол болгаш Кыдатче чурттар аразының коридорун тудар төлевилелге хууда киржилгези база шупту аргаларны ажыглаар чүткүлү дээш Василий Костомаровка өөрүп четтиргенин илереткен. Владислав Ховалыг каайлы ажылдакчыларын четчелээриниң дугайында чугаалажып тура, Тываның каайлы эргелелинче чаа ажылчыннарны хаара тударда, бир дугаарында, тускай шериг операциязының хоочуннарынче кичээнгейни угландырарын аалчыдан дилээн.