Аныяктар херектериниң яамызы 2024 чылда ажыл-чорудулганың түңнелдериниң дугайында илекелди Тываның чазаанга таныштырган. Шупту чурттакчы чонунуң 32 хуузу 14-тен 35 харга чедир назылыг аныяктар, азы 107 муң ажыг кижи болуп турар республикага регионалдыг эрге-чагырга органнарының иштинде кол ведомстволарның бирээзи ол.
Республика Баштыңының эгелээшкини-биле 2024 чылда яамы тургустунганын демдеглээлиңер. Ооң мурнунда чазакта аныяктар политиказын Аныяктар херектериниң талазы-биле агентилел харыылап турган. Владислав Ховалыг аныяктарның хереглелинге дүүштүр эрге-чагырганың ажылын тургузары-биле, структураның эрге-байдалын бедидер дугайында шиитпирни хүлээп алганын тайылбырлаан.
«Күрүнениң аныяктар политиказының системазын хөгжүдери» күрүне программазының күүселдези-биле республикада күрүнениң аныяктар политиказының боттанылгазы чоруп турар. Аныяктар политиказының инфраструктуразын хөгжүдери, ооң иштинде эки турачы дээш социал ужур-уткалыг эгелээшкиннерни деткиири, ажылче тургустунарынга болгаш бодунуң бизнезин ажыдарынга, амыдыралдың берге байдалдарын ажып эртеринге дуза чедирери дээш, оон-даа өске кол сорулгалар салдынган.
Яамы 2024 чылда программаның шупту планнарын күүсеткен, а чамдык угланыышкыннарда - ол ажа берген. Грант фондузу долу ажыглаттынган, оон 15 кижи деткимчени алган. Сайгарлыкчы чоруктуң янзы-бүрү мөөрейлеринге, фестивальдарга, форумнарга, конференцияларга киржип турар аныяктарның саны 2 катап көвүдээн, 5,5 муңдан 12 муң чеде берген. Эки турачы 90 организациялар волонтерлар шимчээшкини кылдыр каттыжып, 28 муң ажыг кижини хаара туткан. Чогаадыкчы төлевилелдерге 22,5 муң, а патриотчу акцияларга 22,7 муң аныяктар киришкен.
Республикада социал ужур-дузалыг төлевилелдерни илередип, деткиир сорулгалыг “Ачы-буян.Төптер” ажыттынып эгелээн. Олар 2024 чылда Кызылда спортчу объектилерни – скейт-паркты база кудумчу спортунга шөлдерни септеп, ажыдарынче бюджеттен дашкаар акша-хөреңгини хаара туткан. «Аныяктар садыы» деп сайгарлыкчы төлевилел нептерээн. 2024 чылда эрткен 5 ярмаркага 255 аныяктар киришкен.
Шылгараңгай демдектерлиг дооскан аныяк специалистерни деткиири уламчылавышаан. Аныяктар яамызы ипотека чээлизиниң чарыгдалдарының чамдыызын эгидер субсидияларны оларга берип турар. Бо программаның ачызында 2013 чылдан бээр 53 кижи чурттаар черни садып алган болза, 2024 чылда олардан тос кижи бажыңналган.
ТР-ниң Аныяктар яамызының 2025 чылда ажылының мурнады көөр угланыышкыннарының аразында – көдээ аныяктарга социал төлевилелдерже регионалдыг грантылар ойнадыр «Тываның аныяктары» деп 4 зоналыг шуулганнар кирген: чылдың-на эртер «Тываның командазы – 2030» өөредилге форуму, «Азияның төвү» студентилер аразынга мөөрей, “Зарница 2.0” шериг-патриотчу оюн, «Россияның байлаа» национал культураларның онгу юбилейлиг фестивалы база «Россияның студент чазы» деп фестивальдың регионалдыг чадазы.
Ада-чурттуң Улуг дайынынга Тиилелгениң 80 чыл оюнга тураскааткан хемчеглер, ол ышкаш аныяктарның салым-чаяанын сайзырадырынга болгаш бот-сайгарылгазынга таарымчалыг байдалды тургузарынче угланган «Аныяктар болгаш уруглар» деп чаа национал төлевилел планнарда онза черни ээлээр.