Бүгү-делегейниң херээженнер хүнүнүң бүдүүзүнде, Спутник микрорайонда Культура хөгжүлдезиниң төвүнге, «Чаңгыс демниг Россияның» херээженнер шимчээшкининиң Тыва Республикада бирги регионалдыг шуулганы болуп эрткен. Бо болуушкун амгы үениң бергелериниң мурнунга херээженнерниң чаа рольдарын болгаш аргаларын сайгарарының чугула шөлү болган.
Муниципалдыг депутаттар, тускай шериг операциязының киржикчилериниң авалары болгаш кадайлары, херээжен сайгарлыкчылар, хөй-ниити ажылдакчылары болгаш волонтерлар дээш 200 ажыг кижи шуулганга чыылган. Бо чылын «Чаңгыс демниг Россия» партияның даргазы Дмитрий Медведевтиң чарлааны Ада-чурт камгалакчызының база Муниципалдыг депутаттың чылында эрткен чыыштың кол сорулгазы – политикага, экономикага болгаш ниитилелдиң социал амыдыралынга херээжен чоннуң киржилгезин калбартыры болган.
Тываның Баштыңы Владислав Ховалыг шуулганның киржикчилеринге байырны чедирген. Ол амгы ниитилелдиң амыдыралының бүгү-ле адырларында бодун чедиишкинниг көргүзүп чоруур херээжен удуртукчуларның чугула ролюн онзалап демдеглээн.
«Амгы үениң берге байдалдарында бистиң херээжен чонувус мурнуку одуругда дайынчыларны, а бажыңынга оларның ада-иезин, кадайларын болгаш ажы-төлүн деткип чоруур. Олар чүгле гуманитарлыг ачы-дуза чыыры-биле кызыгаарлаттынмайн, ТШО киржикчилериниң өг-бүлелерин хайгаарап, ындыг ажылдыг төптерде психологтуг деткимчени көргүзүп турарлар» - деп, Владислав Ховалыг демдеглээн. Ол ышкаш республиканың бүгү деңнелдеринде эрге-чагырга органнарында херээженнерниң улуг командазы ажылдап турарын онзалап демдеглээн. «Кижилер эрге-чагырганың талазындан харыысалганы, кичээнгейни болгаш билиишкинни манап турар. А бо дээрге херээжен чонувустуң бойдустан чаяалгалары-дыр» - деп, Баштың чугаалаан. Регион баштыңының бодалы-биле алырга, амгы үениң херээженнери муниципалдыг деңнелдиң бичии айтырыгларындан эгелээш, регионалдыг болгаш федералдыг деңнелде даалгаларга чедир, хөй янзы айтырыгларны шиитпирлептер улуг күштүг.
Шуулган үезинде, хөй-ниити болгаш ачы-буян ажыл-чорудулгазынга онза идепкейлиг херээжен чонга Россия Федерациязының Президентизиниң өөрүп четтириишкин бижиктерин байырлыг байдалга тывыскан. Шаңналды Россияның Херээженнер эвилелиниң Тываның регионалдыг салбырының даргазының оралакчызы Ольга Дондуй биле Тес-Хем кожууннуң Херээженнер чөвүлелиниң даргазы Розалия Оюн алганнар. Оон аңгыда хамааты ниитилелдиң хөгжүлдезинге, волонтер ажыл-чорудулгазынга болгаш патриотчу ажылга үлүг-хуузун киирген идепкейлиг хөй-ниитичилер партияның регионалдыг салбырындан, “Херээженнер шимчээшкини” төлевилелинден, Россия Федерациязының Федералдыг Хуралының Күрүне Думазының депутады Айдың Сарыглардан, Дээди Хурал даргазы Каң-оол Даваадан болгаш Кызыл хоорайның Төлээлекчилер хуралындан Өөрүп четтириишкиннерни алганнар.
Шуулганның ажылы үш кол шөлге эрткен, ооң киржикчилери херээженнерниң политикага киржилгезин, херээженнерниң (өг-бүле) кадыкшылын болгаш херээженнерниң сайгарлыкчы чорук (ажыл-агыйга) айтырыгларын сайгарган. Оон аңгыда күзелдиг кижилер тыва шай хайындырарының мастер-класстарынга киржип, «Кадакты» сунарының ужурларын билип, «Дошканы» канчаар кылырын өөренип алганнар. Эмчи шинчилгезиниң шөлдеринге хан базыышкынын, чигирин, холестеринни болгаш хан-дамыр деңнелин хынадыр арганы тургускан. «Идегелдиң эрии» ТОС база «СВОим Героям» херээжен волонтерларның дааранылга батальонунуң делгелгезин база делгээн. Культурлуг хөгжүлде төвүнүң фойезинде Ада-чурттуң Улуг дайынынга Тиилелгениң 80 чыл оюнга болгаш аңаа тыва эки турачыларның киржилгезинге тураскааткан «Эки тура-биле фронтуже аъттанган мен» деп делгелгени организастаан.
Ада-чурт камгалакчызының чылынга тураскааткан «Маадырларның иелери» деп фото-чуруктар делгелгези бодунуң ажылын шуулгандан эгелээн. Тускай шериг операциязынга маадырлыы-биле мөчээн оолдарының чуруктарын тудуп алган 80 аваларның портреттерин ында делгээн. Аныяктар ордузунуң шил залында делгеттинген ол ажылдарны март 6-га чедир көрүп болур.
Шуулганның төнчүзүнде хүлээп алган шиитпирлерни, санал-оналдарны болгаш арга-сүмелерни республиканың организацияларынче чорудар.
«Чаңгыс демниг Россияның херээженнер шимчээшкини» деп федералдыг партийжи төлевилел херээженнерниң сонуургалдары езугаар национал хемчеглер стратегиязын боттандырары-биле 2022 чылда кады ажылдажылганы эгелээн. Тываның муң-муң херээженнерин болгаш Россияның бүгү регионнарындан 190 муң ажыг киржикчилерни каттыштырган херээженнер шимчээшкини политиктерниң, сайгарлыкчыларның болгаш хөй-ниити ажылдакчыларының кады ажылдажылгазының шөлү апарып, бүгү республикада херээженнерниң социал угланыышкынныг он ажыг коммерцияга хамаарышпас организациялары-биле ажылдап турар.