Ада-чурттуң Улуг дайынынга Тиилелгениң 80 чыл оюнга тураскааткан Сибирьниң сактыышкын эстафетазынга Тыва Республика үшкү регион кылдыр каттышкан. Акция шугуму-биле Хакас Республиканың, Красноярск крайның база Иркутск облазының девискээрлерин таварып 2266 км орукту эрткеш, регионче чедип келген Мөңге оттуң кезээниң киржилгези-биле сактыышкын хемчеглери Кызылга болуп эрткен.
Тываның девискээринге эртер «Сибирьжилерге сактыышкын» эстафетаны Россияның Онза байдалдар яамызының Тыва Республикада кол эргелелиниң хууда составы хүлээп алган. Красноярск край биле Тыва Республиканың кызыгаарында Мөңге Оттуң чулазын кывыскан эстафетаны хүлээп алган.
Дайын үезинде Тыва Арат Республиканың өртке удур албанының одуруундан дөрт эки турачы фронтуже аъттанган, а өртчүлерниң аразында Тиилелгеге үлүг-хуузун киирген тылдың ишчилери база эвээш эвес.
Дараазында Ада-чурттуң Улуг дайынының чылдарында тыва чоннуң күш-ажылчы маадырлыг чоруунга тураскааткан «Кызыл кош» тураскаалды Улуг Тиилелгениң ыдык одунуң чулазы-биле чырыткан. Ада-чурттуң Улуг дайыны эгелээнде-ле Тыва Арат Республика фашистиг Германияга удур чүгле дайынны чарлаан эвес, а фронтуже чорудар аъш-чем, чепсек-херексел, дериг-херексел-биле Совет Эвилелин хандырган.
Ада-чурттуң Улуг дайынының шөлдеринге тулчуп чораан эки турачы тыва хамаатыларның маадырлыг чоруун, эрес-дидимин илереткен тыва эки турачыларның тураскаалынга Мөңге Оттуң бир кезээ база барган. Дайын эгезинде-ле, Ада-чурттуң улуг дайынынга киржирин дилээн билдириишкиннер ТАР-ниң Чазаанче хөйү-биле кирген. 1943 чылдың сентябрь 1-де 208 кижиден тургустунган аъттыг шеригниң эки турачыларын, ооң иштинде санитар 10 кыстарны Кызылдан фронтуже үдээн.
Тываның девискээринде келген эстафетаның чулазын билдинмес дайынчыга болгаш Тыва Арат Республикадан фашизм-биле демисежир дээш чорупкан дайынчыларның аттарын мөңгежиткен Тиилелге шөлүнге эккелген.
Россияның ОБЯ-зының камгалакчылары «Сибирьжилерге сактыышкын» эстафетазы-биле, Мөңге Оттуң чулазы Сибирьниң 10 регионун таварып, 80 шак дургузунда 5600 ажыг километрни эртер ужурлуг.
Россияның ОБЯ-зының камгалакчылары регионнарга баргаш, уругларга эрес-дидим чорук кичээлдерин эрттирип, сактыышкын хемчеглерин болгаш хоочуннар-биле ужуражылгаларны организастаар. Мөңге оттуң чулазының эстафетазы март 20-де Новосибирск хоорайга доостур.