Тывада тускай шериг операциязының киржикчилерин деткиири-биле социал керээ аргаларын ажыглаары уламчылавышаан. Президент Владимир Путинниң эгелээни «Өг-бүле» деп чаа национал төлевилел күүселдези-биле күрүне деткимчезиниң ол хемчээн бо чылын ажыглап болур. Республиканың Баштыңы Владислав Ховалыгның даалгазы-биле ТШО хоочуннарының күрүне программазынга киржиринге Тываның Күш-ажыл болгаш социал политика яамызы-биле «Ада-чурттуң камгалакчылары» күрүне фондузунуң регионалдыг салбыры дузалажыр.
Бо чылын социал керээ чарар төлевилелдер шилиир республика комиссиязының бирги хуралында, тускай шериг операциязының 11 хоочуну боттарының бизнес-планнарын таныштырган.
Комиссияның хуралы февраль 21-де «Ада-чурт камгалакчызы» күрүне фондузунуң регионалдыг салбырынга болган. Төлевилелдерни боттары болгаш ырактан харылзаа шугуму таварыштыр камгалаан.
Республиканың күш-ажыл болгаш социал политика сайыды Эдуард Санданның удуртканы комиссия ТШО киржикчилериниң ажылдап кылганы 11 бизнес-планнарны сайгарган. 11 төлевилелдиң 10-у бизнес-планнарын камгалап, комиссия кежигүннериниң деткимчезин алган.
Комиссияның бадылааны үш кижи Кызыл хоорайга боттарының ажыл-херээн эгелээрлер. ТШО хоочуну Сергек Күжүгет Вавилин ээтпээ девискээрге ыяш дилдирер чер ажыдарын планнаан. Ол боду техникалыг. Ыяш кезер участокту тускайлап, чөпшээрелди алган, ам күрүне деткимчезиниң акша-хөреңгизи-биле ыяш болбаазырадыр станокту садып алыры арткан.
Өске киржикчи Айдаан Сендажы машина-техника-биле холбашкан ачы-дузаны көргүзер. Ооң чугаазы-биле алырга, Кызылда машина-техника аймаа хөй болгаш, шак ындыг ачы-дуза эргежок херек:
— Күрүне фондузунуң социал координаторлары шупту херек документилерни чыырынга дузалашкаш, меңээ характеристиканы бижип бергеннер. Шупту херек документилерни долдурарынга дузалашкан. Оларның дузазы-биле ам машина караан чайырлап, ооң салонун арыглаар ачы-дузаны көргүзүп эгелээр мен – деп, хоочун дайынчы бодунуң планнары-биле үлешкен.
Кежик Бакук тускай операциядан чанып келгеш, эжиниң техниктиг хыналда пунктузунга ажылдап турган. Бо үениң дургузунда дыка хөйнү билип, арга-дуржулганы чыып, боду СТО ажыдар деп шиитпирлээн. Шимчээр кзектерни септеп, дуңзаалап база диагностиканы кылыптар. Ай санында эвээш дизе 18 машинаны септеп-селип болурун ол дыңнаткан.
Комиссия чогумчалыг шиитпирлерни үндүрген соонда, программа негелдези езугаар, бизнес-идеялар боттандырылгазынга 350 муң рубль түңнүг саң-хөө деткимчезин көргүзер дугайында керээни билдириишкин киирикчилери-биле чарган. А шилилге эртпээн кижиге бизнес-планын немей кылырын сүмелээн. ТШО хоочуну төлевилелин немей эткеш дараазында комиссияга таныштырар.
Күш-ажыл болгаш социал политика яамызы республика комиссиязының дараазында хуралы март эгезинде болурун деп дыңнаткан. ТШО киржикчилериниң өг-бүле кежигүннери – кадайларының болгаш иелериниң билдириишкиннерин көөр.
Республика Баштыңы Владислав Ховалыгның бодалы-биле алырга, ТШО хоочуннарга болгаш киржикчилеринге социал керээни деткимчези улуг идигни берип турар. Республика Баштыңы Күш-ажыл яамызы биле «Ада-чурт камгалакчылары» күрүне фондузунуң регион салбырының удуртукчуларынга ол ажылды онза контрольга тударын дааскан.