Тывада ай санаашкыны-биле чаа чыл – Шагааны уткуурунга белеткел ажылдары чоруп турар. Бо чылын ол март 1-де дүжер. Байырлал хүннерде 30 ажыг массалыг хемчеглер планнаттынганы-биле, харыысалгалыг ведомстволарга хөй чон чыылган – шажын езулалдары, улусчу хөглээшкиннер, ярмаркалар дээш оон-даа өске черлерге айыыл чок чоруктуг хемчеглерин хандырарын республиканың Баштыңы Владислав Ховалыг дааскан. Оон аңгыда, республиканың амыдырал-хандырылга объектилери база онза байдалдар албаннары белен чурумга ажылдаар.
Февраль 24-те, Тываның Баштыңының эрттиргени аппарат хуралында Шагаага белеткелди чугаалашкан. Организаторларның дыңнатканы-биле алырга, марттың 1 дүнезинде чер-черлерге эрттирер “Саң салыр” ёзулал – ай санаашкыны-биле Чаа чылдың кол болуушкуну болур. Тываның найысылалы Кызылда кижилер эң хөй кээр тос аңгы чер – Улуг-Хем эриинде Национал паркка, Дөгээ даанга, Кадарчы тураскаалынга болгаш Түбтен Шедруб Линг хүрээниң чанынга ёзулалды эрттирери планнаттынган. Шак ындыг ёзулалдар март 1-де эртенгиниң 7 шак үезинде республиканың 174 чурттакчылыг черлеринге база болур.
Шагааның кол болуушкуннары февраль 28-тен март 1-ге чедир болур. Республика болгаш муниципалдыг деңнелде планнаан 900 хире хемчеглерниң чартыындан хөйү чоннуң киржилгези-биле эртер. Улуг хемчээлдиг байырлалдар үезинде айыыл чок чоруктуң чогуур деңнелин хандырар дизе, чүгле камгалал күштериниң курлавырлары чедишпес. Ынчангаш эрге-хоойлу камгалакчыларынга дузалажыры-биле эрге-чагырга органнарының албан-хаакчыларындан тургустунган ажылчын бөлүктерни хаара тудар.
ИХЯ-ның орук-патруль албанының ажылын күштелдирген чурумче шилчидер. Корум-чурум тударынче полиция-биле кады 400 хире дружинниктер үнер. Оон аңгыда республиканың Баштыңы март 3-ке чедир дыштаныр хүннер чарлаттынганындан, арага аймаа садарын хораан. Дыштаныр хонуктарда, март 1 биле 2 хүннеринде, амгы хоойлу езугаар арага садары хоруглуг.
Кеземче кылдыр шенелдеде шииттирген кижилерни, ооң иштинде административтиг хайгааралда кижилерни хынап, профилактиктиг хемчеглерни чорудар. Тус чер чагырга органнары малчын турлагларны онза контрольга алыр даалганы алган. Март 1-де Шагаа байырлалының массалыг хемчеглери эгелээр. Кызылдың төп шөлүнге дүъш үезинде театржыткан көргүзүг болгаш концерт болур. Ол-ла хүнде 17 шакта, тыва национал оркестр бодунуң тускай байырлал программазын Национал театрга көргүзер.