Тывада Ада-чурттуң Улуг дайынының хоочуннары болгаш тылдың ишчилери Тиилелгениң 80 чылынга тураскааткан федералдыг төлевирлерден аңгыда, регион бюджединден 50 муң рубльди немей алыр. Ооң дугайында чарлыкка республиканың Баштыңы Владислав Ховалыг атты салган.
Чарлык езугаар Ада-чурттуң Улуг дайынының киржикчилеринге, концлагерьлерниң болгаш геттоларның назы четпээн хоругдаттырганнарынга, Финляндия, фашистиг Германия, Япония-биле дайыннар үезинде өлген шериг албанныгларның дулгуяк кадайларынга, фронтудан чанып келгеш чок болган фронтучуларның дулгуяк кадайларынга төлевир алыр эргени берген.
Тываның 53 чурттакчызы амгы үеде ол төлевирни алыр даңзыда барын ТР-ниң Күш-ажыл яамызы дыңнаткан. Оларның үжү Ада-чурттуң Улуг дайынының киржикчилери, бирээзи концлагерь хоругдаттырыкчызы, 27 кижи тылдың ишчилери база 21 кижи чок болган фронтучуларның дулгуяк кадайлары.
Оларның кайызы-даа төлевирни алыр дээш, кайнаар-даа билдириишкин биживес. Билдириишкин чоккала ону төлээр. Ол сорулга-биле Владислав Ховалыг алыкчыларның даңзызын март 30-ге чедир тодарадып, тургузарын, ол ышкаш акша-хөреңгини кандыг арга-биле бээрин дугуржуп алырын социал албан черлеринге дааскан.
Тиилелгениң 80 чылынга тураскааткан төлевирни алыр эргелиг кижи бүрүзү ону байырлал мурнунда – 2025 чылдың апрель 20-ге чедир алган турар ужурлуг. Республиканың чазаа бюджеттен 2,65 млн. рубльди ол сорулгага тускайлаан.
Регионалдыг төлевирден аңгыда, хоочуннар Тиилелге хүнүнде Россияның Президентизиниң 2025 чылдың январь 15-те Чарлыы-биле доктааткан федералдыг төлевирни алыр дээрзин сагындыраал.
«Хоочуннар дугайында» федералдыг хоойлунуң 2-ги чүүлүнүң 1-ги пунктузунуң 1-ден 3-кү иштики пунктуларында көрдүнген кижилер аразындан Ада-чурттуң Улуг дайынының инвалидтеринге, хоочуннарынга, фашистерниң болгаш оларның эвилелчилериниң тургусканы концлагерьлер, геттолар болгаш өске-даа хоругдал черлериниң назы четпээн хоругдаттырганнарынга, Финляндия-биле дайын үезинде, Ада-чурттуң Улуг дайынының, Япония-биле дайын үезинде чок болган шериг албанныгларның дулгуяк кадайларынга (ашактарынга), Ада-чурттуң Улуг дайынының чок болган инвалидтериниң болгаш Ада-чурттуң Улуг дайынының киржикчилериниң дулгуяк кадайларынга (ашактарынга) 80 муң рубль түңнүг төлевирлер көрдүнген.
«Хоочуннар дугайында» федералдыг хоойлунуң 2-ги чүүлүнүң 1-ги пунктузунуң 4-кү иштики пунтузунда айыттынган кижилер санындан нацисчи концлагерьлерниң, кара-бажыңнарның болгаш геттоларның назы четкен турган хоругдаттырганнары 55 муң рубль хемчээлдиг төлевирни алыр.