Владислав Ховалыг республиканың чурттакчыларынга болгаш аалчыларынга Ада-чурт камгалакчызының хүнү-биле байырны чедирип, чаңчыл ёзугаар Россияның Президентизи Владимир Путинниң, Россияның Чазааның Даргазы Михаил Мишустинниң болгаш Россияның Чазааның Даргазының бирги вице-премьери Денис Мантуровтуң байырлалдың сөстерин дамчыткан.
Чурттуң Президентизиниң байыр чедириишкининде мынча деп бижээн:
«Хүндүлүг Владислав Товарищайович! Ада-чурт камгалакчызының хүнү-биле байыр чедирип тур мен! Бо байырлалды бистиң чуртта өгбелеривистиң дайынчы маадырлыг чоруктарынга болгаш тиилелгелеринге чоннуң кызыгаар чок хүндүткелиниң демдээ кылдыр кезээде байырлап демдеглеп турар. Ада-чуртунга бердинген бараалгалдың төөгүлүг чаңчылдарының ындыг харылзаазы, төрээн черинге ханы ынакшыл бөгүн Россияның шыны болгаш чөптүг чоруу дээш, Төрээн чурттуң хосталгазы болгаш хамаарышпас чоруу дээш эрес-дидим тулчуп чоруур дайынчыларны сорук киирип турар. Силерге чедиишкиннерни болгаш бүгүдеге эки чүүлдерни күзедим».
Россияның Чазааның Даргазы Михаил Мишустинниң байыр чедириишкининде:
«Хүндүлүг Владислав Товарищайович! Ада-чурт камгалакчызының хүнү-биле байыр чедирип тур мен! Бөгүн бистиң чепсектиг күштеривистиң улуг тиилелгелерин, Ада-чурттуң хосталгазын болгаш хамаарышпас чоруун камгалап чораан эрес-дидим дайынчыларның дайынчы маадырлыг чоруктарын сактыр бис. Ол ышкаш бо хүнде Төрээн чуртунга кызыгаар чок бердинген, Россияның айыыл чок чоруун болгаш девискээриниң бүдүн-бүрүн чоруун камгалап, бот-догуннаашкынын болгаш күчү-күжүн быжыктырып, чаа салгалдарның келир үезин хандырып турар бүгү кижилерге онза өөрүп четтиргенивисти илередип тур бис. Силерге болгаш силерниң чоок кижилериңерге чедиишкиннерни, кадыкшылды болгаш чечектелиишкинни күзедим».
Россияның Чазааның Даргазының бирги вице-премьери Денис Мантуров мындыг сөзүглелдиг чазак телеграммазын чоруткан:
«Хүндүлүг Владислав Товарищайович! Ада-чурт камгалакчызының хүнү-биле байыр чедирип тур мен! Бо онзагай хүнде Ада-чуртту камгалаарынга амыдырал-чуртталгазын бараалгаткан кижилерге өөрүп четтиргенивисти, өгбелеривистиң маадырлыг чоруунга хүндүткелди илередип тур бис. Бөгүн, чүгле алдарлыг чаңчылдарны сактып алыры эвес, а Төрээн чуртунга ынакшыл, шынчы болгаш эрес-дидим чорук дээн ышкаш шынарларны деткип, чаа салгалдарга дамчыдары кажангызындан-даа артык чугула. Бо хүн Ада-чуртунга бараан болуп, фронтуга тулчуп азы тылга ажылдап, амыдыралының эң-не эки чылдарын берген кижилерниң кызымак күш-ажылы-биле хандыртынган тайбың, турум болгаш айыыл чок чоруунуң дугайында сагындырып турар. Быжыг кадыкшылды, чедиишкиннери болгаш тайбың дээрни күзедим!»
Ада-чурт камгалакчызының хүнүнге тураскаадып, чаңгыс чер-чурттугларывыстың дайынчы маадырлыг чоруктарын сактып, Тывага Ада-чурттуң хамаарышпас чоруу дээш амы-тынындан чарылган дайынчыларның тураскаалдар чанынга митингилер болгаш чечектер салыр езулалдар болур. Февраль 23-ке тураскааткан сактыышкын хемчеглери бо чылын Ада-чурттуң Улуг дайынынга Тиилелгениң 80 чыл болгаш Ада-чурт камгалакчызының чылы-биле болуп турар.