Россияның Президентизи Владимир Путинниң чарлыы-биле күрүне шаңналдарын тускай шериг операциязының киржикчилери шериг хүлээлгезин күүседирде көргүскен маадырлыг, эрес-дидим болгаш коргуш чок чоруу дээш алганнар. Девискээрниң эрге-хоойлу камгалаар органнарының ажылдакчыларынга албан-хүлээлгезин күүседиринге бедик көргүзүглери болгаш ак сеткилдиг албаны дээш Тыва Республиканың шаңналдарын тывыскан. Ада-чурт камгалакчызының хүнүнге тураскааткан шаңналдар тыпсыр езулал республиканың Национал театрынга регионнуң Баштыңы Владислав Ховалыгның киржилгези-биле болуп эрткен.
Республиканың Баштыңы байырлыг хуралдың киржикчилеринге байыр чедирип тура, Ада-чурттуң камгалакчызының хүнү кижилерниң хей-аъдының күчү-күжүн, эрес-дидим чоруун болгаш бодунуң чуртунга, Ада-чуртунга кызыгаар чок бердингенин көргүзүп дээрзин демдеглээн.
Хөй он чылдарда бүгү эр кижилерниң хүнү болу берген тайбың амыдыралдың байырлалы, бөгүнде тиилелге дээш демнешкен чаңгыс сорулгалыг бүгү чуртта чаа уткалыг байырлал апарган. Россияның Президентизиниң чарлаан Ада-чурт камгалакчызының чылы болганда Февральдың 23 онзагай ужур-уткалыг.
Улуг Тиилелгениң 80 чылынга тураскааткан бо чылда Ада-чурт камгалакчызының хүнү коргунчуг кыжаныгның мурнунга чоннуң эрес-дидим, туруштуг, чаңгыс демниг чоруун сагындырып турар.
- Келир салгалдарның хостуг тайбың чуртталгазы дээш амы-тынын берген миллион-миллион кижилерниң маадырлыг чоруунуң ачызында тиилелге чедип алдынган – деп, Владислав Ховалыг онзалап демдеглээн.
Республика Баштыңы Тываның Улуг Тиилелгеге киирген үлүг-хуузун демдеглеп, Россияның Президентизи Владимир Владимирович Путинниң сөстерин дамчыткан: «Тыва нацизмге удур кады демиселивиске ССРЭ-ниң бирги эвилелчизи күрүне болган. Тыва чон-биле Ада-чурттуң Улуг дайынының эң-не берге чылдарын ажып эрткеш, ооң соонда чуртту, хоорай-суурларны, бүдүрүлгени катап тургузуп, кады хөйнү эрткен бис».
Владислав Ховалыг совет шериг каттыжыышкыннарының составынга фронтуга тулчуп чораан чаңгыс чер-чурттугларывыска, тыва эки турачыларга – аъттыг шериглерге, танкычыларга болгаш ужудукчуларга, Тыва Арат Республикага чурттап чораан муң-муң совет хамаатыларга сактыышкыннарнарны мөңгежидер талазы-биле чорудуп турар ажылдың дугайында чугаалаан. Оларның аттарын Кызылдың Тиилелге шөлүнге тураскаалдарда сиилбип каан. Амгы үеде маадырларның даңзызын немей кирер ажылдар чоруп турар.
Ленинград чоогунга маадырлыы-биле тулчуп чораан Тываның орус оолдары – Шумов алышкыларга тураскаалды Кызылга тургузар төлевилелди Россияның шериг-төөгү ниитилели-биле кады боттандырып эгелээн.
Россия Федерациязының Президентизи Владимир Путинниң чарлыы-биле улуг лейтенант Ооржак Шораан Олегович дайынчы хүлээлгезин күүседиринге маадырлыг, эрес-дидим болгаш бодун хайыравас чоруу дээш «Эрес-дидим чорук дээш» медаль-биле шаңнаткан.
55-ки аңгы гвардейжи мотоадыгжы (дагжы) бригаданың улуг лейтенантызы Дагбы Милан Тоюн-ооловичиге шериг хүлээлгезин күүседип тура маадырлыг, эрес-дидим болгаш бодун хайыравас чоруу дээш, «Эрес-дидим чорук дээш» 2-ги чаданың медалын тывыскан.
Тыва Республиканың Иштики херектер яамызының кеземче истелге эргелелиниң начальнигиниң оралакчызы – агент-оперативтиг ажылды организастаар, оперативтиг-истелге ажыл-чорудулгазын деткиир база информация камгалаар эргелелиниң начальниги, полицияның подполковниги Монгуш Кежик Владимировичиге Иштики херектер органнарынга бедик көргүзүглерлиг база ак сеткилдиг бараан ажыл-албаны дээш Тываның Баштыңының Өөрүп четтиргенин тывыскан.
Албан ажыл-чорудулгазынга бедик мергежилдиг болгаш чедип алган эки үре-түңнелдер дээш, Тываның Баштыңының Хүндүлел бижии-биле шаңнатканнар:
Калзан Чингис Петрович – иштики албанның капитаны, Федералдыг суд пристав албанының Тыва Республика талазы-биле судтар ажыл-чорудулгазының тургустунган чурумун хандырар талазы-биле килдис начальниги,
Лукин Александр Александрович – улуг прапорщик, Россияның ФАА-ниң Тыва Республика талазы-биле кызыгаар эргелелиниң чолаачызы.
Шериг хүлээлгезин күүседиринге көргүскен маадырлыг, эрес-дидим болгаш кызымак чоруу дээш «Тускай шериг операциязының киржикчизи» тураскаалдыг медаль-биле дараазында кижилер шаңнаткан:
Куулар Айбулат Уран-Маадырович – биче лейтенант, «Тыва Республиканың шериг комиссариады» федералдыг күрүне албан чериниң улуг специалист-экспертизи,
Очур-оол Артыш Борисович – 55-ки аңгы гвардейжи мотоадыгжы (дагжы) бригаданың гвардияның улуг сержантызы,
Потехин Владислав Витальевич – капитан, «Тыва Республиканың шериг комиссариады» федералдыг күрүне албан чериниң күрүне чажыттарын камгалаар кезээниң начальниги,
Успун Аңчы Олегович – 55-ки аңгы гвардейжи мотоадыгжы бригаданың гвардияның сержантызы.