Россияның Украинада чорудуп турары тускай шериг операциязының киржикчилеринге бүгү талалыг дузаны көргүзери – российжи эрге-чагырганың кол сорулгаларының бирээзи. Онза кичээнгейни тускай шериг операциязының киржикчилериниң өг-бүлелеринче угландырган. Оларның чамдыызының чурттаар бажың-балгады чок.
ТШО киржикчилериниң өг-бүлелеринге чуртталга бажыңнары тударынга азы садып алырынга акша төлевирлерин мурнады бээриниң чурумун Россия Федерациязының Чазааның 2024 чылдың ноябрь айда үндүрген доктаалы-биле бадылаан. Бо доктаалга үндезилээш, 2025 чылдың эгезинде Тыва Республиканың Чазаа ТШО киржикчилериниң өг-бүлелеринге чуртталга бажыңнары тударынга азы садып алырынга акша төлевирлерин мурнады бээриниң чурумунуң дугайында доктаалды хүлээп алган. Ол доктаалдар ёзугаар үш болгаш оон хөй ажы-төлдүг өг-бүлелер, өг-бүлениң ээлери иелээ азы кайы-бирээзи тускай шериг операциязында киржип турар, азы киржип турган өг-бүлелер чуртталга бажыңнары тударынга, азы садып алырынга акша төлевирлерин мурнады алыр эргелиг.
“Тыва Республиканың чурттакчыларын чедингир болгаш таарымчалыг чуртталга оран-савазы-биле хандырары” күрүне программазының угланыышкыны-биле “Тыва Республикада аныяк өг-бүлелерни чуртталга оран-савазы-биле хандырары” программа ёзугаар тускай шериг операциязының киржикчилериниң өг-бүлелеринге чуртталга оран-савазының сертификаттарын тыпсырының ёзулалы Ада-чурт камгалакчызының хүнүнүң бүдүүзүнде, февраль 21-де, Тыва Республиканың Чазааның бажыңынга болуп эрткен.
Чуртталга оран-савазының сертификаттарын тыпсырының ёзулалының мурнуу чарыында Тываның Баштыңы Владислав Ховалыг Россияның эрге-ажыктарын камгалап, дайынчы хөделиишкиннерде киржип турар болгаш киржип турган дайынчыларга, оларның өг-бүлелеринге Ада-чурттуң камгалакчызының хүнү-биле байыр чедирип, Россияның Президентизи Владимир Путинниң чарлааны Ада-чурттуң камгалакчызының чылында тускай шериг операциязының киржикчилери өг-бүлелеринче онча-менди чанып кээринге идегелин илереткен.
Тываның Баштыңы Владислав Ховалыг тускай шериг операциязының киржикчилериниң 31 өг-бүлезинге чуртталга оран-савазының сертификаттарын тывыскан. Оттук биле Саглаана Моңгуштарның, Владимир биле Аялга Дамбааларның, Айдың биле Саглай Доңгактарның дээш ниитизи-биле 31 өг-бүле оларның амыдырал-чуртталгазынга дузалыг боор документилерни алганнар.
Тускай шериг операциязының киржикчилериниң 90 өг-бүлезинге 2025 чылда чуртталга оран-савазының сертификаттарын бээрин планнаан.