Баштайгыларның шимчээшкини «Тулган ужуражылга» бүгү-российжи төлевилелди боттандырып, Тываның Баштыңы Владислав Ховалыг-биле ужуражылганы эрттирген. Аныяктар ордузунуң улуг залынга эрткен хемчег «Тиилелгениң волонтёры», «Чаштар айтыкчылары», «Эмчи-волонтёрлар» регионнуң аныяктар организаияларның активчилерин, юнармейжилерни, «Тываның буянныг чүректериниң» кежигүннерин, Аныяктар хуралының киржикчилерин болгаш Тываның күрүне университединиң студентилерин хаара туткан.
Владислав Ховалыг Тываның Дээди Хуралының даргазы Кан-оол Даваа база Дээди Хуралдың депутады Руслан Цаликов-биле ужуражылгага киришкен. Баштайгыларның шимчээшкининиң регионалдыг салбырының Чөвүлел даргазы Эртине Куулар хемчегни башкарып эрттирген. Хемчег байдалы ажык болгаш найыралдыгбайдалаг эрткенинден, киржикчилер аалчылар-биле хостуг харылзажып, сонуургаан айтырыгларын салыр аргалыг болган. Чижээ, оолдар шериг албанын сонуургап, келген аалчылардан ак сеткилдиг харыыларны алганнар.
«Оолдар чылыг, чымчак байдалды тургускан. Мергежилди канчаар шилип алганывыска, студент чылдарывыста ажылдап база шериг албанын эрттирип турганывыска сактыышкыннарны кылдывыс. Руслан Хаджисмелович бистиң шылгараңгай чаңгыс чер чурттуувус, Россияның Маадыры Сергей Күжүгетович Шойгу-биле кады ажылдап эрттирген чылдарын сонуургаткан» - деп, Владислав Ховалыг бодунуң блогунда ужуражылганың түңнелдерин бижээш, тыва аныяктар инфраструктура болгаш даг тывыш төлевилелдерин айтырып, чугаа ооң-биле кызыгаарлаттынмаанын дыңнаткан. Эрге-чагырга төлээлери-биле ужуражылгада аныяктар ажыктыг казымалдар шиңгээдилгезин, чиигелделиг ипотека программазын, чаа объектилер тудуун сайгарып чугаалашканнар. – «Олар ооң боттанылгазын чүгле манап эвес, а киржип, дузалажып, боттандырарынга белен. Ужуражылга шуптувуска ажыктыг болган дээрзинге бүзүрээр мен» - деп, республиканың Баштыңы демдеглээн.
Ужуражылгада регионнуң келир үезинге хамаарышкан элээн хөй айтырыгларны, чурттакчы чоннуң амыдырал-чуртталгазының шынарын бедидер талазы-биле хемчеглерни, ол ышкаш инфраструктураны болгаш социал адырны хөгжүдеринче угланган төлевилелдерни сайгарган. Регионнуң эрге-чагыргазы чедиишкинниг камгалап алганы транспорт чедингириниң, чуртталга тудуунуң болгаш чиигелделиг ипотека программазының айтырыгларынче онза кичээнгейни угландырган.
Баштайгыларның шимчээшкининден “Тулган ужуражылгалар” – чурттуң аңгы-аңгы булуңнарындан алдарлыг болгаш чедиишкинниг кижилерни аныяк өскеннер-биле каттыштырган бүгү-российжи эгелээшкин-дир. Хемчеглерниң аалчылары боттарының амыдыралчы оруктарының төөгүзү, профессионал чажыттары болгаш хууда арга-дуржулгазы-биле ажык үлежип турар. Төлевилел Россия Федерациязының Президентизи Владимир Путинниң даалгазы-биле күүсеттинип турар болгаш, аныяк өскенниң база эрге-чагырга төлээлериниң аразында харылзааны быжыглаарынче, төрээн чериниң амыдыралынга идепкейлиг киржир чүткүлдү аныяктарга оттуруп турар. Ол хемчег «Өөредилге» национал төлевилелдиң «Кижи бүрүзүнге социал көдүрлүүшкүннер» федералдыг төлевилелиниң бир кезээ болур.
Ужуражылгаларның киржикчилери спикерден ооң ажыл-ижиниң, хууда амыдыралының азы чедиишкиннериниң дугайында сонуургаан айтырыгларын хостуг салып, чугула айтырыгларга арга-сүмени ап, найыралчы байдалга эртип турар. Мындыг ужуражылгалар аныяк улуска чедиишкинниг кижилерден арга-дуржулганы болгаш билиглерни алыр арганы берип, бодунуң республиказының келир үези дээш харыысалгалыг минниишкинни хевирлээринге идиглиг.