Тыва Республиканың Чазаа Тываның күрүне эргелеп-башкарылга системазын хөгжүдеринге улуг үлүг-хуузун киирген күрүне албанының хоочуну Артына Саин Сайын-ооловичиниң мөчээни-биле ооң чоок болгаш төрээн кижилеринге кажыыдалын илерейлээн.Саин Сайын-оолович Артына 1939 чылдың январь 18-те төрүттүнген. 1963 чылда Кызылдың күрүнениң башкы институдунга «эге класстар башкызы» мергежилди кызыл дипломнуг дооскан. 1972 чылда М.В. Ломоносов аттыг Москваның күрүне университединге «Психология» эртемин чедип алган.
Институт соонда, Тыва АССР-ниң Чөөн-Хемчик районнуң Ийме сес чыл школазынга күш-ажылчы базымын эгелээн. Дараазында чылдарда Чөөн-Хемчик районнуң Улусчу депутаттар совединиң күүсекчи комитединиң улус өөредилгезиниң ниити школалар талазы-биле килдизиниң инспектору, Чадаананың районнар аразында хуу-бот-өөредилге ортумак школазының директору дээш, өөредилге системазынга ажылдаан.
Республиканың дээди өөредилге адырынга хөй чылдарда ажылдаан. Кызылдың күрүнениң башкы институдунуң педагогика болгаш психология кафедразының ассистентизи, башкылар билии бедидер институттуң директорунуң оралакчызы, СЭКП Тыва обкомунуң эртем болгаш өөредилге албан черлериниң килдис инструктору бооп ажылдап чораан. 1984 чылдан 1986 чылга чедир – “Билиг” республика ниитилелиниң даргазының оралакчызы.
Саин Сайын-ооловичиниң өөредилге адырында улуг арга-дуржулгазы, профессионал ажыл-чорудулгазында чедиишкиннери күрүне албанынче шилчииринге идиг болуп, оон Тываның чонунга төлептиг бараан болган. 1984-2005 чылдарда республиканың күрүне эргелеп-башкарылга системазынга харыысалгалыг албан-дужаалдарга ажылдаан. Саин Сайын-оолович Тыва Республиканың Президентизиниң, оон Тыва Республиканың Чазааның Даргазының дузалакчызы чораан.
Артына-биле кады ажыладп чораан эш-өөрү база чаңгыс чер чурттуглары ону бедик билиг-мергежилдиг, интеллигент, мөзү-бүдүштүг, бодунуң ажыл-херээниң харыысалгалыг профессионалы деп сактыр.
Тыва Республиканың Чазаа Артына Саин Сайын-ооловичиниң чоок болгаш төрээн кижилеринге кажыыдалын илергейлеп тур. Бо улуг чидиригниң кажыыдалын силер-биле үлежип тур бис.
Теги:
Тываның Чазаа, хоочуннар, кажыыдал