Февраль 20-де доңурган эъттер, автомобильдер, мотоциклдер, техниктиг дериг-херекселдер, камгалал херекселдери болгаш өске-даа чугула херек чүүлдерлиг чүък машиналарының автоколонназы Кызылдан Донецк Улус Республика биле Курск облазының уунче шимчеп үнүпкен. Чурттакчы чоннуң, хөй-ниити, бюджет болгаш коммерциялыг организацияларның, сайгарлыкчыларның, ол ышкаш Тывада чурттап чоруур чоннарның чыгган гуманитарлыг чүъгү ай санаашкыны-биле Чаа чыл, азы Шагаа бүдүүзүнде чеде бээр. Тываның Чазааның, Улусчу фронтунуң регионалдыг күүсекчи комитединиң, республиканың Камбы-Лама эргелелиниң, Тыва культура төвүнүң база муниципалдыг чагыргаларның деткиишкини база #ВседляПобеды бүгү-российжи акция-биле дузаламчыны чыгган.
Республиканың Баштыңы Владислав Ховалыгның даалгазы езугаар, шериг албанныгларга дузаламчы чыыр ажылды организастаан. Камбы-Лама эргелели Тыва культура төвүнүң чогаадыкчы ажылдакчылары болгаш «Улусчу фронтунуң» регионалдыг күүскомунуң удуртукчузу Саима Далчин-биле кады дайынчыларывыска сөңнү чаңгыс чер чурттугларывыстан чыыры-биле республиканың шупту кожууннарын январь эгезинден эргээн. Бо удаада дайынчыларывыстың чагыы-биле техниктиг дериг-херекселдер чыырынче кол кичээнгейни углап, оон аңгыда тыва эътти, чылыг хептерни база камгалал чүүлдерин чыып, Шагаа бүдүүзүнде оларны чоруткан.
Дузаламчы чыылдазынга шупту кожууннар идепкейлиг киришкенин Саима Далчин онзалап демдеглээн. Чүъктү чорудар хүнге чедир 7 тонна ажыг доң инек, хой, аът база сарлык эъттерин чыгган.
– Чүъктү чорударынга үлүүн киирген бүгү чонувуска четтиргенивис илереттивис. Шупту кожууннар эъдин эккелген. Ниитизи-биле чеди тонна доңгурган коң эъттерни чыыпкан бис. Дайынчыларывысче мооң мурнунда ынча хөй эът черле чорутпаан бис – деп, ол чугаалаан.
20 тоннаның ийи чүък машиназы болгаш соодукчулуг ийи автомобиль, оларда чүдүрген «УАЗ», «Нива» машиналар, элээн каш мотоциклдер, генераторлар болгаш өске-даа техниктиг дериг-херекселдер, дүрген кылыптар аъш-чемнер, «Панцирь» чаштынар четкилер, тепловизорлардан камгалал костюмнар, чылыг хептер, оңгу лаалары, школачыларның шериглерге бижээн чагаалары орукче үнүпкен.
«Мөңгүн» микрорайон девискээринге ажылдап турар тудуг организацияларының төлээлериниң Донецкиде Чаңгыс аай дүүштүрүлге төвүнге дээш саткан автомобили автоколонна-биле чеде бээр. Шериг кезектери болгаш тус чер организациялары-биле читкен дайынчылары дилээр болгаш оларның чоок улузунга дуза кадып ажылдап турар Чаңгыс аай дүүштүрүлге төвүнүң ажылдакчыларынга транспорт дыка херек. Чаңгыс чер чурттугларывыстың дилеглерин дүрген шиитпирлээринге автомобиль дузалыг болуру чугаажок.
Азербайджан, армян, узбек диаспоралар дайынчыларның чагааны дроннарны база дроннар детекторларын чоруткан. «Содействие» фонд, «Элита» КХН, «ГААО-2» АН, хууда сайгарлыкчы Кудер Балчыырак, «Магистральная-17» АЗС кывар-чаар чүүлдер-биле дузалашкан. Республикада билдингир күүседикчи Буян Сеткилдиң эгелээшкини-биле болуп эрткен ачы-буян концертинден чыгдынган акша-хөреңгини бир улуг чүък машиназынга кывар-чаар чүүлдү саткан.
Донецкиге келген гуманитарлыг чүъктү Командирлер чөвүлели уткуп алгаш, тыва оолдарның дайынчы хүлээлге күүседип турар аңгы-аңгы кезектеринче чагыглар езугаар үлежип апаарын Саима Далчин демдеглээн.
Курск облазынче углаан ийиги чүъктү Тываның Дээди Хуралының (парламент) депутады Эрес Хуурак хүлээдир:
- Амгы үеде тулчуушкуннар чоруп турар Курск облазынче дузалакчым-биле кады аъттанып турарывыс бо. Дроннар детекторлары, дүне көөр хараалдар дээн ышкаш техниктиг дериг-херекселдерни аңаа чедирер бис – деп, депутат дыңнаткан.
ТР-ниң Камбы-Лама эргелели тускай шериг операциязының зоназынче база кады үнүпкеннер. Ламалар февраль 28-тен март 1 дүнезинче Донецкиде чаңгыс чер чурттуг дайынчыларга номналдарны эрттирер.