Республиканың Баштыңы Владислав Ховалыг социал четкелерде бодунуң арынында, «Аныяктар болгаш уруглар» деп чаа национал төлевилелдиң өөредилге албан черлерин үндезини-биле септеп-чаартыр программазынче Тываның алды көдээ школазы: Кызыл кожуунда Борбак-оол Араптан аттыг Сукпак ортумак школазы, Чеди-Хөл кожууннуң Хову-Аксы, Тес-Хем кожууннуң Чыргаланды, Сүт-Хөл кожууннуң Бора-Тайга, Барыын-Хемчик кожууннуң Аксы-Барлык база Бай-Тайга кожууннуң Кызыл-Даг суурларның школалары киргенин дыңнаткан. Чаа өөредилге чылында ийи муң хире оолдар, уруглар чаагайжыткан байдалдарда өөренип эгелээр.
Владислав Ховалыг ажылдың ниити дүүштүрүлгезин чорударын Тываның Өөредилге болгаш Тудуг яамыларынга даасканын дыңнаткан.
- Муниципалитеттерниң удуртукчулары тус черде септелге ажылдарынга дузалажып, ооң чорудуун хайгаарынче кичээнгейни угландырар – деп, ол бижээн.
Өөредилге чоруп турза-даа, апрель айда школаларга эде септелге ажылдары эгелей бээр. Муниципалитеттер чагыргазы, өөредилге эргелелдери база школа удуртукчулары септелге үезинде уругларның өөренир чурумун тодараткан. Оон аңгыда изиг чемненилгени ол-ла хевээр организастаар.
Регионнуң Өөредилге яамызының дыңнатканы болза, өөредилге организацияларынга иштики ажылдардан аңгыда, даштын шеверлеп, кырын солуур. Суг хандырылгазының база чорудулгазының чаа четкилерин, өрт айыылынга удур база видеохайгаарал системазын салыр. Ол ышкаш одалга системазын база чырык удазынарын солуур. Чаа соңгаларны база эжиктерни салып, иштики шеверлел ажылдарын кылыр. Школалар чаа эт-септи база өске-даа дериг-херекселдерни алыр. Россияның Чырыдыышкын яамызының методиктиг сүмелери езугаар школачы шөлдерни шимээр.
Тывада школа инфраструктуразын чаартыр программаны боттандырып эгелээнден бээр үш чыл дургузунда 46 школа ону ажыглаан. Республика бо чылдан эгелеп уруглар садтарынга капитал септелге программазында киржир. Ыраккы Мөңгүн-Тайга кожууннуң Мугур-Аксы суурда уруглар садын бо чылын үндезини-биле чаартыр.