Кызылда Тиилелге шөлүнге 55-ки аңгы гвардияның мото-адыгжы (даг) бригадазының дайынчылары бистиң шериг албанныгларывыстың чедиишкиннерин мөңгежидер дээш, «Маадырлар болгаш маадырлыг чоруктар» деп патриотчу акцияны таныштырган. Тускай шериг операциязының киржикчилериниң болгаш хоочуннарының чуруктарын хоорай автобустарынга хөй чонну хаара туткан маршруттарында аскан. Тываның Баштыңының тускай шериг операциязының талазы-биле бүрүн эргелиг төлээзи Тимур Куулар Донецк Улус Республикада мурнуку одуругда тулчуп чоруур ТШО киржикчилери-биле ужуражып чорда, олар боттарының дайынчы эштериниң портреттерин тургузарының дугайында эгелекчи саналды киирген.
«Бистиң дайынчыларывыс оларның төөгүзүн, дайынчы эштериниң маадырлыг чоруун чаңгыс чер чурттуглары утпазын дээш, ындыг саналды киирген. Оларга чоргаарланыр бис – деп, Тимур Куулар акцияны таныштырып тура чугаалаан. — Албан-хүлээлгезинге бедик чедиишкиннерлиг, дайынчы шылгаралдыг, маадырлыг чоруктарны кылган бо оолдарны болгаш өске-даа дайынчыларның шуптузун таныштырар бис. Бо акция – оларның дугайында сактыышкынынга бистиң үлүг-хуувус-тур».
Тываның найысылалында эң нептереңгей маршруттар-биле халдып турар «Автоколонна 17»-ниң 10 автобузунга бистиң республикадан ТШО дайынчыларының чуруктары-биле информастыг плакаттарны аскан. Шупту плакаттарны 55-ки аңгы гвардияның мотоадыгжы (даг) бригадазының ылгавыр демдектери, шериг албанныгларның боттарының күзели-биле маадырларның күрүне шаңналдары, «Кара ирбис» им-демдектер-биле долдурган. Пассажирлер маадырларның боттарын база оларның дайынчы маадырлыг төөгүзүн билип алыр аргалыг.
Оларның аразында 55-ки бригаданың командириниң оралакчызы, Краснолиманск угланыышкынынга дайзын-биле удур шугумунга дайынчы даалгаларны чаңгыс эвес удаа күүседип чораан Сүрен Анатольевич Бады бар. 2024 чылда бригаданың хууда составы-биле оларга онааган даалганы күүсеткен: беш хонук дургузунда кадыг тулчуушкун соонда, хоорай иштинге дайзынның камгалалын үреп, айтып каан девискээрни контрольга ап, Россияның, Тываның болгаш Россияның Камгалал яамызының туктарын Совет шеригниң тураскаалынга көдүрүп, Авдеевка хоорайны хостаарынга киришкен. Ынчан дайзынның күш-шыдалын болгаш элээн каш бронетехниказын узуткаан, а дайзынның арткан шериглери оон ырбап дезипкен.
Бодунуң кезээниң составы-биле Червонопоповка суур чоогунда арга-арыг девискээрин хостаар халдаашкынны чоруткан 1-ги разведка ротазының командири, гвардейжи лейтенант Алексей Оюннуң дугайында өске төөгү база бар. Оюн дайзынның туружун илереткеш, оларның быжыглаттынган пунктузун чок кылып арыглаар даалганы алган. Алексей Оюннуң баштаан разведка взводу болгаш шаап халдаашкын бөлүү штурмну эгелээш, шыңгыы чепсегленген дайзынның каржы удурланыышкынынга таварышкан. Гвардияның лейтенантызы Алексей Оюннуң мерген болгаш дээштиг хөделиишкининиң ачызында, бодунуң составын база халдаашкын кезээниң бөлүүн чидириг чокка удуртуп, дайзындан арганы арыглаан. Бистиң дайынчыларывыс янзы-бүрү даштыкы боо-чепсекти болгаш шериг техниканы эжелеп, ол угланыышкынче дайынчы күштеривисти бурунгаарладырынга идиглиг стратегтиг чугула девискээрни российжи шериглерниң контролюнче киирген.
Ындыг төөгүлер чүс-чүс, бо хүнде оларның чүгле эвээш кезиин хоорай автобустарында таныштырып аскан. Тимур Кууларның чугаазы-биле алырга, Россияның Президентизи Владимир Путинниң Улуг Тиилелгениң 80 чылында Россияга чарлааны Ада-чурт камгалакчызының чылын республиканың Баштыңы Владислав Ховалыг ТР-ниң Дээди Хуралынга Айыткалында деткип, бо чылдың дургузунда ол акцияны уламчылаарын шиитпирлээн. Кызылдан аңгыда, республиканың кожууннарынче үнер пассажирлер транспортун хаара тудуп, маадырларны хөйге-чарга таныштырары планнаттынган.