Февраль 14-тен 17-ге чедир «Знание» российжи ниитилел өөредилге сменазын «Машук» билиглер төвүнге организастаан. Аңаа Россияның 77 регионундан 140 ада-ие болгаш өөредилге организацияларының төлээлери, оларның аразында Тыва Республиканың төлээзи, ТШО киржикчизи Буян-Билег Ооржак киришкен. РФ-тиң өөредилге сайыды Сергей Кравцовтуң киржилгези-биле эрткен Бүгү-российжи ада-иелер комитединиң хуралы - программаның чугула кезээ болган.
«Билиг-биле ада-ие» деп программага киржикчилер уруглар-биле ажылдаарының амгы үениң хевирлерин болгаш аргаларын, өг-бүле биле школаның аразында харылзааның хевирлерин база регионалдыг болгаш бүгү-российжи ада-ие комитеттериниң кады ажылдажылганың онзагай талаларын билип алганнар. 2040 чылга чедир өөредилгени хөгжүдериниң стратегиязын ажылдап кылыры-биле ада-ие ниитилели-биле кады ажылдажылганы ужуражылгада чугаалашкан.
«Бүгү-россияның ада-ие комитединиң кежигүннери-биле кады ажылдажылга өөредилге системазының хөгжүлдезинге чугула херек. Амгы үеде ада-иелерниң эгелээшкиннеринге мөөрейниң ийиги сезонунче киржикчилерни хаара тудары уламчылавышаан, ынчангаш кижи бүрүзүн киржирин кыйгырып тур мен. Бо арга-дуржулганы ниитилелге ажыглаарда, башкыларны болгаш школа директорларының өөредилге талазы-биле чөвүлекчилерин белеткээр мөөрейниң ачызында боттандырган чедиишкинниг төлевилелдерни ажыглаары чугула. Өөредилге адырында ол ажылдарже кичээнгейни угландырарын регион эрге-чагыргаларынга сүмелээр-дир бис. Мөөрей школаның бот-башкарылгазын хөгжүдеринге болгаш өөредилге база кижизидилге чорудуун организастаарынга ада-иелерниң киржилгезинге идигни бээр дээрзин онзалап демдеглексеп тур мен» - деп, Россияның өөредилге сайыды Сергей Кравцов демдеглээн.
Хемчегге ада-ие ниитилелиниң эгелээшкиннеринге мөөрейниң бирги сезонунда чедиишкинниг болган практикаларны болгаш тиилекчи төлевилелдерниң баштайгы түңнелдерин, ол ышкаш ийиги сезоннуң киржикчилериниң келир үеде ажылын сайгарган. Ооң дугайында Россияның «Знание» ниитилелиниң чиңгине директору Максим Древаль дыңнаткан. Ужуражылгага 26 тиилекчи төлевилелдиң төлээлери, ол ышкаш аңгы-аңгы регионнардан ада-иелер болгаш башкылар киришкен. Тываны хөй ажы-төлдүг ада, школа директорунуң чөвүлекчизи, школада ада-ие эгелээшкиннериниң «Ромашка» төвүнүң тургузукчузу, тускай шериг операциязының киржикчизи Буян-Билег Ооржак төлээлеп барган. Ол адалар чөвүлелиниң база идепкейжизи. Директорнуң чөвүлекчизи шериг-патриотчу спортчу клуб төлевилелин боттандырганы дээш «Чылдың эгелээшкини» мөөрейге Тыва Республиканың Баштыңының шаңналын алган. Ужуражылганың төнчүзүнде «Знание» ниитилели биле Россияның Өөредилге яамызы 2025 чылда башкыларга, ада-иелерге, аныяктарга болгаш уругларга 60 хире хемчег кирген каттышкан планны бадылаан.
Россияның «Знание» ниитилелинден база РФ-тиң Чырыдыышкын яамызындан ада-иелер ниитилелиниң эгелээшкиннерге мөөрейниң ийиги сезонунга киржир билдириишкиннерни ам-даа хүлээп турар. 2025 чылда 700 хире млн. рубльди үндүрүп, 4 катап хөй ада-ие комитеттерин шаңнаары планнаттынган. Билдириишкиннерни 2025 чылдың март 11-ге чедир Знание.Академия сайтыга хүлээр.
Знание.Академия шөлүнге чаа онлайн-курс — «Ада-иениң эгелээшкини: төлевилелдерни тургузуп өөренили» деп мөөрейге чедиишкинниг болурунга дузалаар. Курс ада-иелерге чижилгелиг төлевилелди ажылдап кылырынга дузалаар: сорулгаларны болгаш ооң үре-түңнелдерин шын тургузарынга, чарыгдалдар санаашкынын хевирлээринге, командада кол рольдарны үлежиринге болгаш курлавырларны хаара тударынга. Оон аңгыда, ажы-төлүн кижизидеринге, сайзырадырынга болгаш деткииринге бодунуң ролюн эки билип алыр күзелдиг шупту ада-иелер Знание.Академия-дан «Ада-иелер болгаш өөредилге системазы: келир үени кады хевирлээли» деп онлайн-курска киржип болур.