Тыва Республиканың Чазааның Даргазының оралакчызының хүлээлгезин күүседип турар Айдыс Сынаа интернет четкизинде тараан видеога хамаарыштыр социал четкилерде бодунуң арынынга дыңнадыгны үндүрген. Видеода даянгыыштыг шериг кижини чүък машиназынче албадал-биле олуртуп турарын көргүскен. «55-ки даг мото-адыгжы бригада… Тыва Республика…» деп видеода бижээн. Чазак Даргазының оралакчызы 55-ки аңгы гвардейжи мотоадыгжы бригаданың удуртулгазындан медээге даянып, ол видео-бижидилге Кызылга кандыг-даа хамаарылга чок болгаш, айытттынган болуушкуннар Тывадан дашкаар болуп турарын дыңнаткан.
Айдыс Сынаа видео бижидилгеде балыгланган дайынчыга удур күш дөгээн кижилерниң кылган чүүлдери корум-чурум камгалаар черлерден чогуур үнелелди алыр дээрзинге бүзүрелин база илереткен.
Чазак Даргазының оралакчызы чүгле албан езузунуң медээлеринге бүзүрээрин чаңгыс чер-чурттугларындан дилээн:
- Ындыг медээлерни дамчыдар мурнунда, албан-дужаалдыг кижилер бадыткаанын хынап алыңар. Бир эвес чигзинип турар болзуңарза, эксперттер азы күрүне албан-дужаалдыг кижилер-биле харылзажып, тайылбырны ап болур силер - деп, Сынаа бижээн.
Амгы берге үеде республиканың чурттакчы бүрүзүнүң медерелдиг чоруу ниитилелде тайбыңны болгаш корум-чурумну кадагалаарынга дузалаар дээрзин ол сагындырган.