2024 чылда Тывада чарлаттынган Кадыкшыл чылы регионнуң кадык камгалал системазының материал-техниктиг баазазын быжыглаары-биле республикага демдеглеттинген. Ол чыл «Кадык камгалал», «Демография» национал төлевилелдерниң күүселдезин дооскан. ТР-ның Кадык камгалал яамызының февраль 12-де болган коллегия хуралынга ажылдың түңнелдерин үндүрген.
Эрткен чылда көдээде кадык камгалалының 20 объектилерин, ооң иштинде ФАП-тарны болгаш эмнелге амбулаторияларын чаартып, 4 чаа туткан болгаш ол-ла хире санныг тудугну республикада эгелээн. Элээн каш эмнелге участоктарында – Туранда, Самагалтайда база Балгазында чылыг болгаш суг хандырылга инфраструктураларында септелге ажылдарын дооскан. Эндокринология төвүн болгаш хоочураан чүрек аарыг кижилерниң кабинеттерин ажыткан, аңаа 6190 кижиге консультацияны берген, чигир аарыглыг 5431 кижини бүрүткээн.
Орук озал-ондаанга таварышкан кижилерге дүрген дуза чедирер системаны экижиткен. Дүрген дуза чедирер машиналар навигация дериг-херекселдери-биле чепсегленген болгаш, озал-ондак болган черже дыка дүрген чедип турар. Кемдеп-берттинген кижилерге дүрген дузаның шынарын экижидер болгаш өлүмнү эвээжедир дээш травматология төптериниң четкизин тургускан.
Ажы-төлдүң кадыкшылын камнаар болгаш кадагалаар талазы-биле онза кичээнгей салдынган. Республиканың уруглар эмнелгезинден специалистерниң дүрген эмчи дузазын чедирери-биле үнүүшкүннери 24,5 хуу өскен, эмнелгелерде уругларның байдалын 6 шак болгаш хайгаараарын организастаан, хүннүң-не уруглар салбырларының онлайн хыналдаларны чорудуп турар. 1 хар четпээн уругларже эмчилер кыйгырткан хүнүнде чедип турар. 357 уруг бедик технологтуг дузаны алган.
2024 чыл «Кадыкшыл камгалалы» национал төлевилел күүселдезиниң сөөлгү чылы болган. Ооң шугуму-биле Тывада 5 чыл дургузунда кадык камгалалының 61 объектизи туттунган, 412 санныг бедик технологиялыг эмчи дериг-херекселдерин база 51 автотранспортту садып алган. Чоннуң кадыын камгалаарынга база кол черни ээлеп турар «Демография» национал төлевилел езугаар алды хоккей шөлдерин туткан, Улуг-Хем биле Бии-Хем кожууннарда Гериатрия төвүнүң салбырларын ажыткан.
Президент Владимир Путинниң национал сорулгаларында дүүштүр 2025 чылда салган кол угланыышкынның бирээзи – чурттакчы чоннуң чайгаар өзүлдезин хандырары болур. Тыва ол көргүзүг талазы-биле чуртта мурнакчы болуп турар, ынчалза-даа сөөлгү чылдарда чаштарның төрүттүнериниң эвээжеп турарындан дээштиг хемчеглер негеттинип турар. Ол дээрге ажы-төлдүг өг-бүлелерге, ылаңгыя чаа төрүттүнген чаштарге деткимчени көргүзери-дир. Тывада Республика Баштыңының эгелээшкини-биле Тывада «Кадык амыдыралче орук», «Уругнуң кадыкшылынче орук» төлевилелдер ажылдаар.
Россияның Президентизиниң 2025 чылда чарлааны Ада-чурт камгалакчызының чылының программазынче Тыва база кирген. Ооң мурнунда ышкаш, Ада-чурттуң Улуг дайынының болгаш тускай шериг операцияларының киржикчилеринге эмчи дузазын мурнады көргүзер. Оларны диспансеризацияже хөйү-биле хаара тудар дээш, Кадык камгалал яамызы «чаңгыс көзенек» хевирге хандырылганы организастаарын планнаан.
2025 чылда эгелээн чаа национал төлевилелдер база Тывага немелде аргаларны ажыдып турар. Республика хар-назынны узадыр болгаш ие-чашты камгалаар сорулгалыг «Идепкейжи узун назын» болгаш «Өг-бүле» дээн ышкаш национал төлевилелдерже каттыжып кирген.