Бөгүн Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев биле Россияның казначейство даргазының оралакчызы Александр Демидов олар Новосибирск хоорайга ужурашкан.
Киржикчилер Россия Федерациязының бюджет системазында бюджеттиң күүселдезиниң, тускай сорулгалыг акша-хөреңгиге казна үделгезиниң, казна төлевирлериниң системазында бюджет мониторингизиниң айтырыгларын сайгарган. Ылаңгыя, бөгүнде Россияның казначействозу национал төлевилелдерни боттандырарынче көрдүнген акша-хөреңгини хайгаараар, ажык-эрге-хоойлу тургузугларының саң-хөө ажыл-чорудулгазының адырында чаңгыс аай учет, контроль база информастыг система болуп турарын демдеглээн.
Александр Демидовтуң чугаазы-биле алырга, казначейство бюджет мониторингизи дээн ышкаш контрольдуң хевирин ажыглап турар, тускай сорулгалыг акша-хөреңги алыкчыларының хууда агар саннарын ажыдарда болгаш ол агар саннарже транзакцияларны чорударда саң-хөө хажыдыышкыннарын болдурбазын эвээжедиринче угланган. Федералдыг казначейство баш бурунгаар болгаш амгы контроль аргаларын ажыглап тургаш, тускай сорулгалыг акша-хөреңгиниң ажык-чарлыг чоруун болгаш сорулгалыг ажыглалын хандырар.
Россияның күрүне баштыңы Владимир Путинниң чарлыктарының болгаш даалгаларының күүселдези-биле чурттуң социал-экономиктиг хөгжүлдезиниң айтырыгларын шиитпирлээринче база хамаатыларның амыдырал-чуртталгазының шынарын бедидеринче элээн хөй акша-хөреңгини угландырып турарын бүрүн эргелиг төлээ демдеглээн. Оларны чедимчелиг ажыглаарын база тускай сорулгага чарыгдаарын хандырары кончуг чугула, ол чүүл ведомстволар аразында идепкейлиг кады ажылдажылганы, ооң иштинде Федералдыг казначействонуң девискээр албан черлериниң киржилгезин негеп турар деп, Анатолий Серышев чугаалаан.