Тываның Баштыңы Владислав Ховалыг Москвага сургакчылаашкынының үезинде Россияның бирги вице-премьери Денис Мантуров-биле ужурашкан. Ужуражылга үезинде, Президент Владимир Путинниң 2024 чылдың сентябрьда Кызылга кээп чорааш федералдыг чазакка бергени даалгаларында республиканың социал-экономиктиг хөгжүлдезиниң айтырыгларын чугаалашкан.
Президентиниң Тывага чораанының соонда бир ай эрткенде, РФ-тиң Чазааның Даргазының бирги оралакчызы Денис Мантуровтуң деңнелинге эрткен хуралда сентябрьның протоколун күүседир талазы-биле дүүштүрүкчүнүң хүлээлгелерин аңаа дааскан. Мантуров-биле ужуражылгага Тываның шапкын хөгжүлдезин хандырар кол төлевилелдерни, ол ышкаш оларның киржикчилерин тодараткан.
Республиканың Чазаа декабрьда Россияда эң улуг үлетпүр компаниязы – «Ростех» күрүне корпорациязы-биле кады ажылдажылга дугуржулгазынга атты салган. Корпорация аңаа дүүштүр Тывада амгы үениң үлетпүр бүдүрүлгезин тургузарынга, ажыктыг казымалдар тывыжынга, бойдус камгалалдыг технологияларны кииреринге, кадык камгалалын чурагайжыдарынга дээш, элээн каш инвестиция төлевилелдерин боттандырып турар.
Компания даг-болбаазырадылга бүдүрүлгелериниң хереглелдеринге эмульсиялыг частыр бүдүмелдер бүдүрер заводту туткаш, ажылдаткан. Оон аңгыда «Ростех» структуразы Тывада бар Россияда эң улуг литий чыдынын болбаазырадыр эргени алган.
Владислав Ховалыг амгы үеде Москвада сургакчылаашкынының үезинде Тываның транспорт төлевилелдерин боттандырары-биле тургускан ведомстволар аразының бөлүү элээн каш даалгаларны күүсеткенин Денис Мантуровка дыңнаткан. Ылаңгыя, чуртка эң чугула инфраструктура төлевилели – Тываны таварты Моол болгаш Кыдатче демир-орук коридорун тударынга техниктиг-экономиктиг үндезинни ажылдап кылырынга техниктиг негелделерни белеткээриниң сөөлгү чадазынче үнген.
2021 чылда Россияның Чазааның бадылааны Тывага энергетика хандырылгазының комплекстиг планын боттандырарының чорудуун хуралга сайгарган. Чуртта чес курлавырының талазы-биле беш улуг чыдыннарның бирээзи Ак-Суг мөөң чыдынында тывыш комплекизин чырык энергиязы-биле хандырарынга 220 кВ күчүлүг 312 километр узун электри шугумун тудары планнаттынган. Ол шугум даг-болбаазырадылга бүдүрүлгелерин чырык-биле хандырарындан аңгыда, магистральдыг электри четкизинден ырак болгаш автономнуг дөстеринден чырык-биле хандыртынып турар Тываның чедери берге мурнуу кожууннарны электри-биле хандырарынга үндезин болур.
Владислав Ховалыг Тываның чурттакчылыг девискээрлерни, ооң иштинде Тожу кожуунну болгаш Кызыл агломерациязын чырык-биле хандырар ужурлуг улуг хемчээлдиг төлевилелдиң ол кезээн боттандырарының айтырыгларын аңгы контрольга алырының дугайында Денис Мантуровка чугаалаан. Бо тургустунган айтырыгларның шиитпири ниитизи-биле 130 муң кижиниң сонуургалдарында.