Тываның Баштыңы Владислав Ховалыг Москва хоорайга ажыл-агыйжы сургакчылаашкынының үезинде Россия Федерациязының спорт сайыды Михаил Дегтярёв-биле ужурашкан. Ийи тала республикада спортчу инфраструктураны хөгжүдериниң айтырыгларын сайгарып көрген.
Чугула төлевилелдерниң бирээзи - Каа-Хем хоорай хевирлиг суурда спортчу-культура төвүнүң тудуун база чугаалашкан. Кызыл хоорайның база ол чоок-кавызының чурттакчылары объектиниң ажыглалга кирерин 10 чыл хире манап турарлар. РФ-тиң Спорт яамызының база федералдыг эрге-чагырганың талазындан деткимчениң база республика чазааның командазының шудургу ажылының ачызында ол ам доозулгалак. Чаа спорт-культура төвү хары угда 4500 көрүкчүнү хүлээп алыр улуг спортчу төп апаар. Хөй ажыл-чорудулгалыг, ийи каът аренага волейбол, баскетбол, мини-футбол, гандбол, аңгы-аңгы хүрештерге маргылдааларны эрттирип болур. Удавас ажыттынар төп Улуг Тиилелгениң 80 чылынга база Ада-чурт камгалакчызының чылынга алдар болдуруп “Победа” деп атты алган. Владислав Ховалыг ооң дугайында шиитпирин республиканың Дээди Хуралынга депутаттарга Айыткалын берип тура дыңнатканын сагындыраал.
Бо чайын чаа спортчу төптү ажыткан байырлыг хемчегже Россияның спорт сайыды Михаил Дегтярёвту чалаанын Тываның Баштыңы социал четкилерде бодунуң арынында дыңнаткан. Владислав Ховалыгның чугаазы-биле алырга, бо төп ажыттына бээрге, республика бүгү-российжи болгаш делегей чергелиг улуг маргылдааларны бедик деңнелде эрттирер аргалыг апаар. Чоокта чаа Тывага спортчу хүрешке Россияның юбилейлиг чемпионады база ча адарынга Россия чемпионады болуп эрткенин сагындыраал.
Тыва Россияның Спорт яамызының тускай угланыышкынныг программаларындан акша-хөреңгини хаара тударынга идепкейлиг киржип турарын Владислав Ховалыг демдеглээн. Ол ажылдың ачызында, бо чылын регионнуң найысылалынга эштир бассейнниг, модульдуг спорт залдыг база “угаанныг” спорт шөлчүгештиг амгы үениң спортчу кластерин тудуп эгелээр. Ооң-биле чергелештир республиканың кожууннарында спортчу инфраструктураны эде чаартып база чаа объектилерни инвесторларның киржилгези-биле тудар ажылдарны уламчылаар. Чижээ, Эрзин суурда 90 млн рубль өртек-үнелиг күш-культура-спорт залының тудуун уламчылаар. Эрзинчилер спорттуң аңгы-аңгы хевирлеринге ойнаар шөлдүг, уштунар, арыгланыр, чунар черлерлиг, амгы үениң эптиг спорт залдыг болур.
Тываның Баштыңы республиканың эрге-чагырга черлери күш-культура болгаш спортту чон ортузунга нептередир дээн кол айтырыглар талазы-биле чедиишкинниг ажылдап турарын онзалап демдеглээн. Ол ажыл үре-түңнелдерни берген. Бөгүн Тыва кадык амыдыралче хамаатыларны хаара тутканының деңнели-биле чурттуң мурнакчы регионнарының санынче кирип турар.
Красноярскстаттың көргүзүүнден алырга, бистиң республиканың беш чурттакчының бирээзи-ле спорт-биле өңнүк. Тываның спортчулары улуг российжи болгаш делегей маргылдааларында шаңналдыг черлерни ээлеп турар. Чижээ, 2024 чылда Тываның чыынды командазы сумога Россия чемпионадынга ниити команданың саны-биле бирги черни ээлээн. А бо чылдың февраль эгезинде тыва спортчулар дыңнавас спортчуларның хостуг хүрешке Россияның Бирги чери дээш маргылдаазынга команда аайы-биле бирги черни алган.
Бо хүннерде, февральдың 10-14 хонуктарында, Иранның Керманшах провинцияга Азияда эң улуг «Iran Sumo Open 2025» деп сумога делегей маргылдаазы эртерин демдеглээлиңер. Тываның сумо мөгелери Россияның спортчу чыынды командазының составынга бир дугаар хүрежирлер.