.jpg)
Тывада суг объектилеринге болгаш ооң чоогунда алдынар дүрүмнер талазы-биле чурттакчы чон ортузунга профилактиктиг ажылды күштелдирген. Республиканың муниципалдыг районнар чагыргаларының удуртукчуларынга бо дужаалды понедельникте болуп эрткен регион чазааның аппарат хуралынга берген.
Чоокта чаа Тожу кожуунга болуушкун ажылды күштелдиреринге чылдагаан болган. Февральдың 8-те, эртенги үеде, Тоора-Хем суур чоогунда улуг хемге улгады берген эр кижи дошче ойлуп дүшкен. Ол чоок-кавынга элээди оолдар ону кончуг дүрген эскерип кааш, чогуур дузаны көргүскенинден айыыл-халап чайлай берген.
Тус черниң 9-ку классчылары сугда дүшкен эр кижини эскерип кааннар. Камгалал албанын кончуг дүрген кыйгыртыпкаш, дош кырынга илчирбелендир туттунчуп алгаш, сугга дүшкен кижини дуза келгижеге салбааннар. Россияның ОБЯ ТР-де КЭ 16-гы өрт-камгалал кезээниң өртчүлери кончуг дүрген келгеннер. Узун ыяштарны ажыглап чорааш, сугга дүшкен кижиге четкеш, ооң амы-тынын камгалаан. Дүрген дуза эмчилери ол эр кижини шинчээш, байдалы анаа деп түңнээн.
Камгалал операциязы чедиишкинниг доозулган, камгалакчылар оолдарның шиитпирлиг болгаш шын хөделиишкиннери дээш четтиргенин илереткен, оларның эрес-дидим чоруун албан демдеглээр.
Республиканың хамааты камгалал болгаш онза байдалдар албанының демдеглээни-биле алырга, 2025 чылда сугга болган бир дугаар болуушкун бо. Эрткен чылдың ноябрьдан эгелеп Тывада дошталган суг объектилеринге чоруурунуң айыылының дугайында чоннуң билиглерин бедидер угланыышкынныг «Чуга дош» деп чаңчылчаан профилактиктиг акция эртип турар. Бо хүнге чедир хемчеглерже он муң хире чурттакчыларны хаара туткан.