Тыва Республиканың Чазааның Даргазының оралакчызының хүлээлгезин күүседип турар Уран-оол Ондар Россияның үлетпүржүлер болгаш сайгарлыкчылар эвилелиниң президентизи Александр Шохин-биле Москвага сургакчылаашкын үезинде ужурашкан. Оон аңгыда РҮСЭ-ниң Тыва Республикада регионалдыг салбырының даргазы Буян Тагаланов, Москвада Тыва Республиканың бүрүн эргелиг төлээзиниң чөвүлекчизи Владимир Чебодаев база РҮСЭ-ниң вице-президентизи Сергей Мытенков база ужуражылгага киришкен.
Кол кичээнгейни Тыва экономиканың кол адырларын хөгжүдериниң болгаш инвестицияны хаара тударының аргаларынче угландырган. Регионнуң ажыктыг казымалдар тывыжы, көдээ ажыл-агыйы болгаш туризм дээн ышкаш, байлак үлетпүр болгаш бойдус курлавырларын барымдаалап, инфраструктураны хөгжүдеринче, ол ышкаш үлетпүр болгаш энергетика инициативаларының улуг эгелээшкиннерин боттандырарынче угланган төлевилелдерни сайгарып чугаалашкан.
Транспорт болгаш логистика инфраструктуразын экижидер эгелээшкиннерни, ол ышкаш биче болгаш ортумак сайгарлыкчы чорукту деткиир хемчеглерни чугаалажып көрген. Россияның үлетпүржүлер болгаш сайгарлыкчылар эвилели регион эрге-чагыргаларының, үлетпүр болгаш бизнес ниитилелдериниң аразында харылзааны тургузарынга идепкейлиг кады ажылдаар күзелин илереткен.
Ылаңгыя Александр Шохин даштыкы партнерлар-биле ажылдаарының доктааттынган аргаларын билир башкарыкчы российжи банкылар таварыштыр санажылганы организастаарын саналдап, Тывага ажылдаар сорулгалыг кыдат инвесторларга деткимчени көргүзеринге беленин илереткен. РҮСЭ амгы үеде Тываның идепкейлиг ажылдап турары инфраструктура – Хандагайтыда тускай экономиктиг зонаны хөгжүдеринге киржир перспективаны база сонуургап турар. Бо зонага транспорт-логистика компаниялары, улуг склад операторлары, бараан хүлээп алыр пунктулар болгаш янзы-бүрү бүдүрүкчү бүдүрүлгелер кирер, ооң кол ажыы – онза экономиктиг зонаның иштинде чиигелделиг үндүрүг онаалдазының ачызында улуг камналгалыг болуру.
Тываның эрге-чагыргазы бодунуң талазындан Россияның үлетпүр болгаш сайгарлыкчылар эвилелинге республиканың девискээринге боттандырып болур инвестиция санал-оналдарын – дараазында сайгарып, боттандырары-биле киирер сорулгалыг.
Ужуражылганың түңнелинде, ийи тала Тыва Республиканың инвестиция эгелээшкинерин боттандырар болгаш экономиктиг күчү-күжүн быжыглаар дээш кады ажылдаарын дугурушкан.