10.02.2025 16:47

Сентябрьда Россияның Президентизиниң республикага сургакчылаашкынының үезинде берген даалгаларының күүселдезиниң талазы-биле федералдыг ведомстволарга ээлчеглиг ужуражылгаларга киржир дээш, Тываның Баштыңы февраль 10-да Москвага чеде берген. Владислав Ховалыг социал четкиде бодунуң блогунда, күрүне баштыңының даалгазы езугаар амгы күрүне программаларынга болгаш национал төлевилелдерге, ооң иштинде чаа төлевилелдерге киржилгени дүүштүрер ажылды чорударын дыңнаткан.

«Республиканы чаа национал төлевилелдерже киириштирери дээрге, Дээди Хуралга мээң Айыткалымда Тываның социал-экономиктиг хөгжүлдезиниң кол угланыышкыннарынга, ооң иштинде чурттар аразының транспорт төлевилелдериниң, Каа-Хем суурда улуг спортчу-культура төвүнүң тудуун доозарынга хамааржыр пунктуларны боттандырары-дыр» - деп, республика Баштыңы РФ-тиң Чазааның кежигүннери-биле болур ужуражылгаларның темаларын дыңнаткан.

Владислав Ховалыгның Москваже сургакчылаашкынының үезинде, Россияның бизнес-структураларының удуртукчулары-биле инвестиция төлевилелдеринче угланган ужуражылгалар база планнаан. Президент Владимир Путинниң деткимчези-биле 2022 чылда тургускан Буддизм өөредилгезин болгаш шинчилелдерин деткиир фондунуң Хайгаарал чөвүлелиниң хуралынга киржир аңгы пункт база бар.

Теги: Тыва Республиканың Баштыңы Владислав Ховалыг, Тываның Баштыңының ажыл-агыйжы сургакчылаашкыннары

Владислав Ховалыг Тывага хамаарыштыр Президентиниң даалгаларының күүселдезин федералдыг коллегалары-биле сайгарар