Тывага 176 олуттуг, спортчу шөлдүг база бир школаны – бо удаада Торгалыг суурда тудар. Республиканың Баштыңы Владислав Ховалыг Улуг-Хем кожууннуң ол суурунга сургакчылап чорааш, ооң дугайында дыңнатканын бодунуң блогунда бижээн. Тудугну дүрген эгелээри-биле белен төлевилелдерни ажыглаарын ол сүмелээн.
«Келир үениң школазынга 27,2 муң дөрбелчин метр шөлдүг чер участогу тодараттынган – ону амгы школаның чанынга тудар. «Мээң бодалым-биле, ол суур ортузунда шөл дыка эптиг. Ам чаа школа тудуу чоруп турар үеде уругларга үзүктел чок өөредилге чорудуун хандырар байдалдарны тургузары чугула. Тудугну бо чылын эгелеп алгаш, ийи чыл иштинде доозуптарын планнап турар бис» - деп, Владислав Ховалыг бижээн.
Чаңгыс аай төлевлелди ажыглап республикада элээн каш школаларны туткан. Ол төлевилел ажыглалы бюджет акша-хөреңгизин камнаарындан аңгыда, тудугну дүрген эгелээринге салдарлыг. Торгалыг суурда амгы школаны 1929 чылда тутканын сагындыраал. Школаның кол оран-савазын 1963 чылда туткан. Республиканың эрге-чагыргазы Торгалыг суурга чаа школадан аңгыда, чаа Культура бажыңын тударын планныг.