2024 чылда Тывага капитал септелге программазы-биле шупту 167 муң дөрбелчин метр шөлдүг, хөй квартиралыг 54 чуртталга бажыңнарынга капитал септелгелерни чоруткан. Республиканың найысылалы Кызылда эң хөй – хөй квартиралыг 44 бажыңнарны септээн. Оон аңгыда Ак-Довуракта дөрт, Шагаан-Арыгда беш, Хову-Аксы суурда бир бажыңнарны чаарткан. Капитал септелге ажылдарынче ниитизи-биле 116, 27 млн рубльди чараан.
Регионалдыг капитал септелге фондузунуң дыңнатканы болза, 2025 чылда 129 558,40 дөрбелчин метр ниити шөлдүг хөй квартиралыг 44 бажыңны септээр, ооң 37-зи – Кызылда, 5-жи – Ак-Довуракта, 2-зи – Шагаан-Арыгда. Республиканың Чазаа эрткен неделяда 2025 чылда септээр бажыңнарның даңзызынче хөй аалдыг ийи бажыңны киирген өскертилгелиг, капитал септелге планын бадылаан.
Тываның чурттакчылыг черлеринде хөй квартиралыг бажыңнарда ниити өнчүнүң капиталдыг септелгезин организастаарының дугайында республика хоойлузунга өскерилгелерни киирген. Тываның Баштыңы Владислав Ховалыг ында саналдаан - капиталдыг септелгеже дадывырларны санаар хуусааларны, 2043 чылга чедир санаан капиталдыг септелгениң регионалдыг программазынче кирген хөй квартиралыг бажыңнарның техниктиг байдалын хынаарын организастаарының чурумун, база ол ышкаш регионалдыг программаны белеткээриниң болгаш бадылаарының азы ынаар өскерилгелерни киирериниң чурумун тодараткан эдилгелерни деткээн.
Сөөлгү үш чылда капитал септелге программазы-биле Тывада 101 хөй квартиралыг бажыңнарны септээн. Бажыңнар иштиниң инженер системаларын, лифт дериг-херекселдерин, крышаларын болгаш даштын септээр ажылдарны чоруткан. Ажылчыннар бажыңның ниити саналга дериг-херекселдерин салып, үрелген артык кезектерин солуп, кирер черлерни чылыглаан.