Тываның Баштыңы Владислав Ховалыг Улуг-Хем кожууннуң Чодураа суурда “Көдээ девискээрлерниң комплекстиг хөгжүлдези” күрүне программазы-биле тудуп турар 175 олуттуг чаа школа тудуун чедип көрген. Ооң дугайында бөгүн социал четкилерде арынында дыңнаткан. Бо школа 2025 чылда ажыглалче киирер баштайгы төлевилелдерниң бирээзи, суурнуң уруглары чаа өөредилге чылын чаа школазынга уткууру планнаттынган.
Республика Баштыңының чугаазы-биле алырга, ол хүннү суурнуң улуг-даа, бичии-даа кижилери четтикпейн манап турарлар. 1970 чылдарның төнчүзүнде туттунган эрги школа дүрген өзүп орар уруглар санынга дүүшпес, бичии боорда, айыылдыг. Бөгүнде ында 150 ажыг кижи өөренип турар, ам-даа 100 хире школа назыны четпээн уруглар удавас школаже кирер.
Тудугнуң кыры хагдынган, аңгы котельнаяны туткаш, ажыглалче киирген, оон чылыгны оран-саваже дамчыткан, суг хандырылгазын болгаш канализация системаларын шөйүп, ажылдаткан. Школа ырактан-на ылгалып, суурнуң каасталгазы апарган деп, Владислав Ховалыг бодунуң блогунда демдеглээн.
Тываның Баштыңы тус чер бот-башкарылгазының деткимчези-биле өг-бүлелерге огород өстүрүп ажаар чаагай чаңчылды катап эгидир дээн акцияның дугайында чаңгыс чер чурттугларынга сагындырган. 2025 чылда Дээди Хуралга бодунуң Айыткалын таныштырып тура, тус чер чагыргалары суг хандырылгазы, чемишчидилге болгаш үрезиннер-биле өг-бүлелерге дузалажырын айыткан.
Чаңгыс чер чурттуглар республика Баштыңы-биле боттарының суурунуң хөгжүлдезинге хамааржыр өске-даа айтырыгларны ажык чугаалажыр эптиг арганы ажыглааннар. Владислав Ховалыг төрээн суурунуң чурттакчыларының огород ажылынга сонуургалын сактып чугаалаан. Оон аңгыда, алды соток черинден «борщ ногааларын» артыкшылдыг кылдыр ажаап ап турарлар база бар. Бир эвес республика хөй дүжүт алырынга магадылалдыг суггарылга системазын тударынга дузалажыптар болза, элээн улуг бүдүрүлгени ажылдадырынга белен бис, деп чамдыктар чугаалаан.
«Бичиимде маңаа чурттап чораан болгаш, картошказы кайы хире чаагайын сактыр-дыр мен. Бо чылын республикага «Өг-бүлениң шыгжамыры» деп улуг хемчээлдиг акцияны эгелээр бис. Чаңгыс чер чурттугларым ажылды шуудуп алырынга белен болганынга өөрүп тур мен. Канчаар деткиирин дараазында чугаалажыр бис» – деп, Тываның Баштыңы чугаалааш, күскү дүжүт байырлалынга акцияның түңнелдерин чаңчыл езугаар үндүрерин сагындырган.