Республиканың Баштыңы Владислав Ховалыг Тывадан шериг албанынче кыйгырткан солдат Кудерек Артынаның албан хүлээлгезин эрттирип тургаш мөчээниниң чылдагаанын тывар даалганы берген. Владислав Ховалыг Тывадан шериг оолдуң чок болганының дугайында медээни алган дораан, Артынаның өг-бүлезинге чогуур дузаны көргүзер база болган чүүлдү эки сайгарар айтыышкынны берген.
Республика Баштыңының даалгазы езугаар, вице-премьер Айдыс Сынаа чок болган солдаттың авазының адындан РФ-тиң Чиңгине прокурорунуң оралакчызы – кол шериг прокурор Валерий Петровче онза болуушкунга хыналданы эрттирерин дилээн албан езузунуң негелдезин чоруткан.
Республикада кижиниң эргелериниң талазы-биле бүрүн эргелиг төлээ Александр Адыгбай халаптыг таварылганың чылдагааннарын тодарадыры-биле Брянск облазында онза болуушкун болган шериг кезээнче үнүпкен. Ооң-биле кады Москва хоорайда Тываның бүрүн эргелиг төлээ чериниң төлээлери обласче кады чорупканнар.
Кызыл кожууннуң Черби суурунуң чурттакчызы Артына шериг албанын эрттирип тургаш чок болган дугайында медээ социал четкилерге болгаш мессенджерлерге январь 21-де тараан. 2024 чылдың майда ол шериг албанынче аъттанган. А солдат оолдуң ада-иези январь 19-да ооң эштеринден ындыг медээни алганнар.