
Тываның Баштыңы Владислав Ховалыг Чадаана хоорайга угарлыг ыштан когараан өг-бүлениң төрелдеринге болгаш чоок улузунга ханы кажыыдалын илереткен. Айыыл-халапка таварышкан 11 харлыг оолду болгаш ооң улуг угбазын хынап, шинчиир кылдыр республиканың уруглар эмнелгезиниң анестезиология болгаш реанимация төвүнден бригада Чөөн-Хемчик кожуунче үнүпкенин социал четкилерде бодунуң блогунда ол дыңнаткан.
Чөөн-Хемчик кожуун чагыргазының дыңнатканы болза, оолдуң байдалы чүгээр, ону улаштыр хайгааралга алыры-биле республиканың уруглар эмнелгезинче шилчидер шиитпир хүлээп алдынган. Угбазының байдалы чогумчалыг, ол Чадаанага эмнээшкинни алыр.
Чадаана хоорайның Подгорная кудумчузунда чер бажыңнарның бирээзинге онза байдал болган. Угарлыг ыштан хораннанган хевирлиг тус черниң үш чурттакчызының мага-боду тывылган дугайында дыңнадыг корум-чурум камгалаар органнарже кирген.
Өг-бүле үш ажы-төлү-биле ук бажыңга чурттап турганы билдинген. Ада-ие болгаш 9-ку классчы 15 харлыг уруг ол-ла черинге чок болган, а 11 харлыг оол-биле оон улуг угбазын эмнелгеде чыттырган.
Корум-чурум камгалаар органнар байдалдың канчаар болганын тодарадыры-биле болуушкунну истеп эгелээн, суд-эмчи истелгези база чоруп турар.
Өг-бүлениң Кызылда чурттап, өөренип турар база бир кызы барын Владислав Ховалыг бодунуң блогунда дыңнаткан. Регионнуң удуртукчузу арткан уругларга база төрелдеринге чогуур дузаламчыны көргүзерин айыткан.
«Профилактика хемчеглерин күштелдирери чугула дээрзин бо онза болуушкун база катап көргүскен» - деп, демдеглээн. Тываның Баштыңы чагырга даргаларынга болгаш аңгы-аңгы ведомстволардан харыысалгалыг специалистерге республиканың хуу секторунче массалыг профилактика рейдилеринче дарый үнүп, ылаңгыя одаар печкалар база хоолайларже онза кичээнгейни салыр даалганы берген. Ылаңгыя хөй ажы-төлдүг азы улгады берген кижилер чурттап турар бажыңнарны онза хайгааралга алыр.
Понедельникте, аппарат хуралында, Владислав Ховалыг угарлыг ыштан хораннаныышкынга удур профилактика ажылдарын күштелдиреринче кичээнгейни угландырып, чугула хемчеглерни чорудары-биле чогуур даалгаларны бергенин сагындыраал. Эрткен неделяда республикага, Каа-Хем, Кызыл база Улуг-Хем кожууннарга, угарлыг ыштан хораннанган үш таварылга бүрүткеттинген. 15 кижи когараан, оларның 10-у – уруглар.