Главная
Пресс-служба
Медээлер

Владислав Ховалыг кышкы дыштанылга черлеринге уругларның айыыл чок чоруун күштелдирерин негээн

04.02.2025 11:05

Тываның Баштыңы республиканың кожууннар чагыргалары, ол ышкаш оперативтиг ведомстволар болгаш албаннар даргалары киришкен аппарат хуралында, назы четпээн уруглар-биле болган ийи озал-ондактар-биле холбаштыр айыыл чок чорукту хандырган немелде хемчеглерни алырын дааскан. Эрткен дыштаныр хонуктарда бистиң республикадан ийи бичии уруглар-биле онза болуушкуннар Тывадан дашкаар черлерге болган.

Тывадан чеди харлыг бичии оол өг-бүлези-биле Таиландыга уруглар ойнаар бедик черден аңдарылгаш, бетон кырынга кээп дүшкен. Бичии кижи аар кемдээн, амгы үеде эмчилерниң хайгааралында.

Өске болуушкун – 15 харлыг кыс уруг Красноярск крайда Ергаки бойдус парыгынга хаактап тургаш, мөчээн. Дагдан бадып тургаш ыяшка ол үскен. Оперативтиг албанның ажылдакчылары чогуур хемчеглерни ап турза-даа, ооң амы-тынын камгалап ап шыдавайн барганнар. Болуушкуннуң канчаар болганын истээри-биле, айыыл чок чоруктуң негелделеринге дүүшпес ачы-дузаны көргүзүп турары дээш, чогуур чүүлге даянып, кеземче херээн оттурган.

Тываның Баштыңы Владислав Ховалыг кышкы үеде уругларның чуңгуулаарынга айыыл чок черни шилип, эптиг этти ажыглап, каяа-даа чорааш, айыыл чок чорукче онза кичээнгейни углаарын кыйгырган.

Республиканың Баштыңы Онза байдалдар яамызының Тывада кол эргелелинге база тус чер чагыргаларынга чон ортузунда нептереңгей дыштаныр черлерге, ооң иштинде “Тайга” дыштанылга баазазынга кичээндириглиг сагындырыг демдектерни тургузуп, улуг информастыг ажылды организастаарын дааскан. Оон аңгыда албан черлери чурттакчы чонга, бир дуугарында, уругларга айыыл чок дыштанырының дүрүмнерин тайылбырлаарын негээн.