
Бөгүн Новосибирск хоорайга Россия Федерациязының Президентизиниң Сибирь федералдыг округда бүрүн эргелиг төлээзи Анатолий Серышев РФ-тиң Федералдыг Хуралының Федерация Чөвүлелиниң экономиктиг политика талазы-биле комитединиң даргазының бирги оралакчызы Алексей Синицын-биле ажылчын ужуражылганы эрттирген.
Экономиктиг политика талазы-биле комитеттиң адырларында амгы хоойлужудулга айтырыгларын сайырып чугаалашкан. Алексей Синицынның чугаазы-биле алырга, биче болгаш ортумак сайгарлыкчы чорук субъектилеринде бүдүү ажылдадыр чорукту соксадырын чедип алыры; Россияның регионнарында аалчылар хүлээп алыр адырны хөгжүдери; чуртта авиабилет өртектерин чурумчудары болгаш авиа-аргыжылганың чедингирин бедидери – амгы үеде ажыл-чорудулганың мурнады хөгжүдер угланыышкыннары болур. Оон аңгыда регионнарның экономиказын хөгжүдеринге кол барымдаа болур инвестиция төлевилелдерин боттандырарынга байдалдарны тургузары болгаш күш-ажылдың бүдүрүкчүлүүн бедидерин доктаамал кичээнгейге алыр.
Ооң-биле чергелештир «Чаңгыс демниг Россия» бүгү-российжи политиктиг партияның Сибирьде регионнар аразының координация чөвүлелин удуртуп турар Алексей Синицын бүрүн эргелиг төлээге чөвүлелдиң бо чылда планнарын дыңнаткан. Оон аңгыда чаа национал төлевилелдерге, ол ышкаш эде чаартынган партия төлевилелдерин боттандырарынга партияның регионалдыг салбырларының киржилгезин сайгарган.
Ужуражылга үезинде тускай шериг операциязының киржикчилеринге, хоочуннарынга болгаш оларның өг-бүле кежигүннеринге бүгү талалыг деткимчени көргүзериниң айтырыгларынче онза кичээнгейни угландырган. Бо даалга мурнады боттандырар сорулга болурун ол демдеглээн. А ооң иштинде 2025 чылда Ада-чурт камгалакчызының чылында ол угланыышкын-биле ажылдаарынга күрүне эрге-чагырга органнарының, партийжи болгаш хөй-ниитичи тургузугларының болгаш хамаатыларның күжениишкиннерин улам каттыштырып, боттуг түңнелдерни чедип ап, Тиилелгевисти чоокшуладыр.