Тывада тускай шериг операциязының аныяк киржикчилеринге чаа чиигелдени киирген – оларның өг-бүлелери “Чурттакчыларны чиик өртектиг болгаш таарымчалыг чурттаар оран-сава-биле хандырары” регионалдыг программада көрдүнгени езугаар, чурттаар бажың садып азы тудуп алырынга социал төлевирни ап болур. Эрткен неделяда республиканың Баштыңы Владислав Ховалыг аныяк өг-бүлелерге ындыг төлевирлерни бээриниң дугайында Дүрүмге чогуур өскерилгелерни киирген республиканың Чазааның шиитпиринге атты салган.
Амдыгаа чедир ол ачы-дуза чүгле үш болгаш оон хөй ажы-төлдүг өг-бүлелерге, өг-бүлениң кайы бирээзи 35 хар четпээн болурун, ол ышкаш чаңгыс азы оон хөй ажы-төлдү азырап турар бот ада-иелерге хамааржыр турган. Оон аңгыда, ону 2005 чылдың март 1-ге чедир чурттаар байдалын экижидеринге хереглелдиг өг-бүле кылдыр бүрүткеттинген өг-бүлелерге төлеп турган.
Ам бо даңзыже ТШО киржикчилериниң өг-бүлелерин киирген. Өскерилгелер езугаар, өг-бүлениң бирээзи азы ийилээ тускай операцияга киришкен, хөй ажы-төлдүг, ол ышкаш ТШО-га ада-иениң бирээзи киришкен, азы долу эвес өг-бүлелер төлевирлерни ап болурун айыткан. Оон ыңай, Тываның чазаа программага оларның киржиринге мурнады бээр квотаны доктааткан – ачы-дуза алыкчыларының бүгү оочурунуң 70 хуузун оларга аңгылаан.
Программаның негелделери-биле субсидияның хемчээлин доктааткан болгаш, ажы-төл чок өг-бүлелерге чурттаар оран-сава өртээниң 30 хуузун, а артканнарынга 35 хуу болурун чурумчуткан. Субсидия алыкчылары ол акша-хөреңгини бажың садып азы чаа тудугда квартира садып алырынга, боттарының бажыңын тударынга, азы ипотеканың баштайгы төлевиринге азы ону дуглаарынга ажыглап болур.
ТР-ниң Саң-хөө яамызының дыңнатканы болза, 2024 чылда Тывада 120 аныяк өг-бүле чурттаар оран-сава садып алырынга 158 млн рубль түңнүг төлевирлерни ажыглаан. 2025 чылдың республика бюджединде чурттаар оран-сава байдалын экижидер оочурда кирген аныяк өг-бүлелерге субсидия бээри-биле 149,2 млн рубльди аңгылаан.