
Тыва Республиканың Кадык камгалал адырында «Буянныг чүрек» күрүне шаңналының бир угланыышкыны – “Чылдың камгалалы”. Ол шаңналды нарын берге байдалдарда кижиниң амы-тынын камгалаан кезиишкиннерни база өске-даа эмчи ажылын чоруткан, ол ышкаш клиниктиг болгаш ниитилел ужур-дузалыг ажылды көргүскен эмчилерге тыпсыр.
Тываның Баштыңы Владислав Ховалыг бо чылын ол шаңналды республиканың №1 эмнелгезиниң үш эмчизи – Сайзана Соян, Арсений Ондар база Белек-оол Дугурга тывыскан.
Рентген эндоваскулярлыг диагностика болгаш эмнээшкин эмчизи Сайзана Шолбановна Соян чүректиң нарыыдаан ишемия аарыын эмнээринге профессионал ажылы дээш шаңнаткан. 59 харлыг аарыг кижиниң митральдыг клапанының хордазы чарлы бергенинден шокче кирген. Кончуг дүрген кылган кезиишкин чедиишкинниг доозулган.
Республика эмнелгениң эндоскопия салбырының эндоскопист эмчизи Арсений Сергеевич Ондар 2023 чылда бедик технологиялыг «видеолапароскопиялыг холецистэктомия» ажыглаан 21 кезиишкинни эрттирген. Видеолапароскопиктиг технологияларын ажыглап, кожуун эмнелгелеринге болгаш эмнелге төптеринге өдүнде даштыг аарыг кижилерге кезиишкин кылырының чаа арга-хевирин практикаже киирген. Инновациялыг бо чаа арга аарыг кижилерни дүрген сегидип, стационарга чыдар хуусаазын ийи катап эвээжеткен.
Арсений Сергеевич амгы үеде тускай шериг операциязында албанын эрттирип турары-биле, ооң шаңналын өөнүң ишти алган.
Нейрохирургия салбырының нейрохирург эмчизи Белек-оол Кунаевич Дугур 2024 чылдың ноябрьда оорга сөөгүнде кемдээшкин алган 37 харлыг аарыг кижиге дарый кезиишкинни эрттирген. Кемдээн соонда-ла дыка кыска хуусаа дургузунда оорганың чүнүнге декомпрессияны кылган. Ооң ачызында аарыг кижиниң ам-тынын ап, инвалид болурундан чайлаткан. Кезиишкин соонда аарыг кижи кончуг дүрген катап сегип, дараазында хүнде бут кырынга туруп, көъп-белдир органнары катап ажылдап эгелээн.
Республиканың дүрген эмчи дузазы болгаш медицина катастрофаларының төвүнүң фельдшерлери Андрей Монгуш биле Долаан Донгак аарыг кижилерге соңгаарлаттынмас дуза көргүзеринге күжениишкиннери дээш аңгы шаңналды алганнар.
Бо эмчилер болгаш фельдшерлер кижилерге сеткилинден бараан болурунуң үлегер-чижээн көргүскенннер. Кижиниң амы-тынын камгалаар херекке эмчи ажылдакчыларының ажылы кайы хире чугула черде турарынга олар көскү чижек болганнар.