Главная
Пресс-служба
Медээлер

Владислав Ховалыг үш эмчиге ховар кезиишкиннери дээш «Буянныг чүрек» күрүне шаңналдарын тывыскан

01.02.2025 10:48

Тывада Кадыкшыл чылын хаап тура, республикада кадык камгалалының адырында «Буянныг чүрек» деп эң-не хүндүлүг шаңналын үш кезер эмчилер алган. “Кижиниң амы-тынын камгалап каан онзагай кезиишкинни чорутканы дээш” деп угланыышкынга – Республиканың №1 эмнелгезиниң рентген-хирургтуг диагностика болгаш эмнээшкин салбырының эргелекчизи, дээди квалификациялыг эмчи Сүгдер Антольевич Бады, туберкулезка удур диспансерниң хирург эмчизи Мерген Михайлович Монгуш база республиканың 1 дугаар эмнелгезиниң чүрек-дамыр хирургу Артыш Радиславович Ондар олар лауреаттар болганнар.

Республиканың №1 эмнелгезиниң рентген эндоваскулярлыг диагностика болгаш эмнээшкин талазы-биле эмчизи Сүгдер Анатольевич Бадының ады республикага 2015 чылда-ла коронарлыг хан-дамырга стент салырының аргазын бир дугаар кииргени-биле нептереңгей апарган. Ол арганың ачызында аарыг кижилер республикадан үнмейн, амгы үениң эмчи дузазын ап турарлар. Эмчиниң кылган эң чугула кезиишкиннериниң бирээзи - бажынче хан чүгүрген аарыг кижиниң мээзиниң дамырларында ханның агымын катап тургусканы.

Мооң мурнунда республикага ындыг операцияларның дыка нарынындан база эмчи дузазын чедирериниң үе-шагының кызыы болганындан кылдынмайн турган. Кезиишкин чокта, ындыг таварылгалар өлүмге чедирип турган. Кезиишкин чедиишкинниг болуп, каш хонук эрткенде, аарыг кижиниң хол-буттары шимчеп, чугаа-домаа үнүп келген. Эмнелгеден үнүп турда, байдалы оон-даа экижип, мага-боттуң ажыл-чорудулгазы катап тургустунуп келген, аарыг кижи реабилитациязын улаштыр эрткен.

Туберкулезка удур диспансерниң кезер эмчизи Мерген Михайлович Монгуш Сүгдер Бады-биле кады база-ла аарыг кижиден бестиң дыка улуг кистазын ап кескени дээш, Тываның Баштыңындан хүндүлүг шаңналды алган. Тываның төөгүзүнде бир дугаар ындыг кезиишкин болганы ол.
Республиканың №1 эмнелгезиниң чүрек-дамыр хирургу Артыш Радиславович Ондар ол эмнелгеге ийи чыл ажылдааш, 136 ажыг операцияларны, ооң иштинде моюннуң болгаш буттуң дамырларынга улуг нарын кезиишкиннерни кылганы дээш лауреат атка төлептиг болган.

Артыш Ондар 2023 чылдың январь, май, июльда улуг дамырларның атеросклерозунга үш гибридтиг операцияны республикада бир дугаар чедиишкинниг эрттирген. Хан-дамырларны алгыдар стентилерни ажыглаары-биле холбаалыг кезиишкиннер. Кезиишкиннерниң сорулгазы – инсульт база ооң-биле холбашкан аар уржуктарны эвээжедири.

Бирги таварылга аар хан-дамыр аарыглыг кижиге хамааржыр, ол аарыг кижини инвалид болдурар. Кезиишкин чедиишкинниг болуп, тос ай эрткенде аарыг кижиниң кадыы экижээн. Ийиги аарыг кижиниң дамырлары чиңгелээш, инсультка чедирип болур турган. Ол кижиге база улуг кезиишкинни чоруткан, ооң байдалы элээн экижээн. Үшкү кезиишкинни бажынче хан чүгүрген аарыг кижиге кылган. Ооң хан-дамырлары база бергедээн турган, ынчалза-даа кезиишкин соонда кадыы экижип эгелээн.

Эмчи дузазын көргүзериниң негелделерге дүүштүр кижилерниң амы-тынын камгалаан, ооң иштинде бистиң республикада бир дугаар ажыглаттынып турар ховар кезиишкиннер – эмчилерниң профессионал хүрээлеңинде чаартыкчы арга-хевирлерни ажыглаан эмчилерге төлептиг үнелелди берген.