Главная
Пресс-служба
Медээлер

Тываның перинаталдыг төвүнүң ажылдакчылары «Буянныг чүрек» күрүне шаңналдарынга төлептиг болган

03.02.2025 10:56

Республиканың Перинаталдыг төвүнүң беш ажылдакчызы «Буянныг чүрек» күрүне шаңналының «Амыдыралдың эгези» номинацияда лауреаттар болган. Эмчилер Мария Тестова, Саяна Сат, Алена Шон-оол, Светлана Гулик база акушер Юната Монгуш оларның аразынче кирген. Чаа төрүттүнген чаштарның болгаш оларның иелериниң кадыкшылы болгаш камгалалы дээш харыысалгалыг специалистерни демдеглээр «Амыдыралдың эгези» деп номинацияга олар эң-не тергииннерниң санынче кирген.

Республиканың Баштыңы Кадыкшыл чылының хагдынганынга тураскаадып эрткен фестивальда мөөрейниң тиилекчилеринге 250 база 200 муң рубльдиң сертификаттарын тывыскан. Шаңнал бүрүзүнүң артында – төлептиг ажыл-херек, хууда чедиишкин бар деп, Владислав Ховалыг чугаалаан. Чижээ, Мария Тестова республиканың анестезиолог-реаниматологтарының аразындан божудулга үезинде азоттуң оксиди-биле ингаляциялыг терапияның технологиязын бир дугаар ажыглап, бергедээн чаш төлдү катап диргизип алган.

База бир онзагай таварылга – 51 харлыг херээжен кижиге ЭКО процедуразын чедиишкинниг кылганы. Эмчи Алёна Шон-оол акушерка Юната Монгуш-биле кады, иштелир аргазы чок аарыг кижиге ие болурунуң өөрүшкүзүн тывыскан. ЭКО-ну чаңгыс эвес ажыглаан, ооң төөгүзү бир чыл ажа берген. Чүгле эмчилерниң шыдамыының болгаш бедик мергежилиниң ачызында кайгамчык күзел бүткен – херээжен кижи ие болган.

Владислав Ховалыг шаңнал алыкчыларынга байырын чедирип тура, эмчилерниң ачызында Тыва төрүттүнериниң бедик деңнелин кадагалап артырганын демдеглээн. Сөөлгү он чылдарда Тывада чаштарның өлүп-хораар чоруу 7 катап кызырылганың кол чылдагааны - перинаталдыг медицинаның ажылдакчыларының ачы-хавыяазында деп, ол чугаалаан.