Главная
Пресс-служба
Медээлер

Бүрүн эргелиг төлээ «Локоволей – 2024» юбилейлиг маргылдааның тиилекчилеринге шаңналдарны тывыскан

02.02.2025 09:01

Новосибирск хоорайга Россия Федерациязының Президентизиниң Сибирь федералдыг округда бүрүн эргелиг төлээзи Анатолий Серышев 2008-2009 чылдарда төрүттүнген оолдар болгаш уруглар аразынга «Локоволей-2024» деп «Россияның демир-оруктары» ААН-ның делегей чергелиг волейбол чемпионадының суперфиналының тиилекчилеринге байырны чедирген.

“Локоволей” маргылдаазы дээрге, волейболдуң ёзулуг байырлалы-дыр. Даштыкы чурттардан командаларның киржилгези аңаа улуг ужур-утканы берип турар” – деп, бүрүн эргелиг төлээ маргылдааның киржикчилерин болгаш аалчыларын уткуп тура чугаалаан.

«Россияның демир-оруктары» ААН, «Локомотив-Новосибирск» волейбол клубу база «Локомотив-Калининград облазы» деп херээжен волейбол клубу мөөрейни организастап эрттирип турар. Чемпионаттың кол сорулгалары - элээдилер ортузунга волейболду сайзырадыры, аныяк спортчуларның мергежилиниң деңнелин бедидери, ол ышкаш волейболду болгаш кадык амыдыралды хөйге нептередири болур.

Бо чылын «Локоволей» он беш дугаар эртип турар, 2010 чылда эгелээнинден бээр 150 муң ажыг элээди ойнакчылар маргалдааларга киришкен. «Локоволей-2024» суперфиналдың киржикчилериниң аразында Новосибирск, Белгород, Казань, Кемерово, ол ышкаш Краснодар край, Иркутск, Калининград, Сахалин болгаш Челябинск областарның командалары бар. Оон аңгыда маргылдаага Моолдан, Беларусь Республикадан база Казахстан Республикадан командалар киришкен.

Эрткен күзүн маргалдааның баш бурунгаар чадалары Анапа, Иркутск, Хабаровск болгаш Нижний Новгород хоорайларга эрткилээн. Маргылдааның төнчү оюннары Новосибирск хоорайга «Локомотив Арена» спорт комплекизинге январь 29-тан февраль 1-ге чедир болуп эрткен. “Новосибирск-Главный” демир-орук вокзалының залынга маргылдаалардан аңгыда, аалчыларга болгаш киржикчилерге мастер-классты, делгелгелиг оюннуг культура программазын бир дугаар организастаан.

Бүрүн эргелиг төлээ маргылдааның тиилекчилеринге алдын медальдарны болгаш кубоктарны тывыскан: уруглар аразынга Беларусь Республиканың командазы, а оолдар аразынга Татарстан Республиканың командазы чемпионнаан. Оолдар аразынга маргылдааның мөңгүн медальдарының эдилекчилери – шөлдүң ээлери Новосибирск база уруглар аразынга Челябинск облазының командазы болганнар. Калининград областың уруглары болгаш Белгород областың оолдары үшкү черге төлептиг болганнар.