Республика Баштыңы Владислав Ховалыгның эрткен чылын Тывага чарлааны Кадыкшыл чылында көдээ эмнелге инфраструктуразын чаартыр болгаш кадык камгалалының улуг объектилерин тудар ажылдарны 2025 чылда база уламчылаар. Амгы үеде регионда кадык камгалалының улуг объектизи – республиканың уруглар эмнелгезин тудуп турар. Республиканың Баштыңы Дээди Хуралга Айыткалында республиканың онкология диспансерин тударынга акшаландырыышкынның дөстерин тодаратканын база республиканың туберкулёз эмнелгезин тудар айтырыгны ажылдап кылып турарын база демдеглээн.
Владислав Ховалыг Кадыкшыл чылының түңнелдерин үндүрүп тура, боттарының кадыкшылынче кичээнгейни хаара тудары болгаш кадык амыдыралды нептередири – чылдың хемчеглерниң кол сорулгазы болганын сагындырган. Диспансеризация болгаш профилактиктиг шинчилгелерже онза кичээнгейни угландырып, чүс муң хире кижини шинчээн. Элээн каш чылдарда бо угланыышкын-биле ажылдап келген чугула төлевилелдерниң бирээзи – «Кадыкшылдың маршруду» – «Кадык амыдыралче орук» деп хевирге катап эгелээр, а уруглар шинчилгезинге «Уругнуң кадыкшылынче орук" деп маршрутту аңгылаан. «Көжүп чоруур бүгү-ле диагностика курлавырларын ажыглап, кожууннарже эмчи үнүүшкүннерин күштелдирер херек» – деп, Владислав Ховалыг чугаалаан.
«Узун болгаш идепкейжи амыдырал» чаа национал төлевилел күүселдези-биле, 2025 чылда республиканың муниципалдыг тургузугларынга 12 чаа фельдшер-акушер пунктуларын (ФАП) база эмнелге амбулаторияларын тудуп, көдээде кадык камгалалының амгы беш объектизинге капитал септелгени чорудар.
Регионалдыг Кадык камгалал яамызының дыңнадыы-биле алырга, Улуг-Хем кожууннуң Торгалыг суурга, Барыын-Хемчиктиң Эрги-Барлыкка чаа эмнелге амбулаториялары туттунар.
Чөөн-Хемчик кожууннуң Бажың-Алаак, Теве-Хая, Хайыракан, Хорум-Даг база Шеми, Барыын-Хемчик кожууннуң Аксы-Барлык, Тожу кожууннуң Чазылары, Адыр-Кежиг, Ий база Каа-Хем кожууннуң Бүрен-Бай-Хаак суурларга фельдшер-акушер пунктуларын тудары көрдүнген.
Оон аңгыда амгы бар инфраструктураның чаартылгазын уламчылаар: Тожу, Чаа-Хөл, Чеди-Хөл, Чөөн-Хемчик база Таңды кожууннарда беш эмнелге объектилеринге капитал септелгени чорудар.
Төлевилел күүселдези-биле көдээ чурттакчыларга эмчи хандырылгазын элээн экижидип, боттарының чурттап турар черлеринге амгы үениң шынарлыг эмчи дузазын алыр арганы берген. Чаа болгаш эде туттунган эмнелге албан черлери амгы үениң негелделеринге дүгжүп, чонга көргүзер ачы-дузаның шынарын бедидер.
2021 чылдан 2024 чылга чедир «Кадык камгалалы» национал төлевилелдиң баштайгы эмчи дузазын эде чаартыр программаның күүселдези-биле, Тыва Республикада 24 фельдшер-акушер пунктузу база 10 эмнелге амбулаториязы туттунганын сагындыраал. 16 кадык камгалал албан черлеринге капитал септелгени чоруткан.