Январьның 29-та, Тываның найысылалынга Өг-бүле чылын түңнээн байырлыг хемчег болуп эртер. «Россия Федерациязының Маадыр-иези» Айнааш Ондар, «Чылдың өг-бүлези» бүгү-российжи мөөрейниң база ооң регионалдыг чадазының тиилекчилери Дамчаа-Монгуш өг-бүле байырлалының хүндүлүг аалчылары кылдыр чалаан. Ол ышкаш тус чер бот-башкарылга органнары биле хөй-ниити организацияларының төлээлери аңаа киржир.
Республиканың кожууннарындан база найысылал Кызылдан үлегерлиг өг-бүлелерни аңаа шаңнаар. Республиканың ады-сураа алгаан чогаадыкчы коллективтери база алдарлыг артистер байырлалдың концертин бараалгадыр. Тывада Өг-бүле чылының кол болуушкуннарындан фоточуруктар делгелгезин Улусчу чогаадылга бажыңының фойезинге таныштырар.
2024 чылда өг-бүлелерни деткииринче угланган программалар болгаш төлевилелдерни хөйү-биле боттандырган. Чурттуң Президентизи Владимир Путин, декабрь төнчүзүнде Күрүне чөвүлелиниң хуралынга сөстү алгаш, өг-бүлениң үнелиг чүүлдерин деткиири үр хуусаалыг күрүне политиказының чугула кезээ дээрзин айыткан. Бүгү Россияда ышкаш, Тывада база 2025 чылдың январь 1-ден өг-бүлениң үнелиг чүүлдерин быжыглаарынче угланган “Өг-бүле” деп чаа национал төлевилел ажылдап эгелээн. Ооң күүселдези-биле амгы деткимче хемчеглерин, программаларны болгаш чиигелделерни ам-даа уламчылап, күштелдирер. Өг-бүлелерниң хереглелдерин өөренип көргеш, деткимче хемчеглерин оларның хереглелдеринге таарыштыр ажылдап кылыр.
2024 чылдың түңнелдери-биле Тыва чаштарның төрүттүнери-биле чуртта мурнуку туружун хевээр арттырган. Сөөлгү үш чылда республикага 5500 ажыг чаштарның төрүттүнгени регионда өг-бүле – онза үнелиг чүүл дээрзин бадыткап турар.