Тываның Баштыңы Владислав Ховалыг Красноярск хоорайга болуп эрткен Иван Ярыгин кубогу дээш делегей чергелиг маргылдаага чайынналчак көргүзүглерлиг болган спортчулар-биле ужурашкан.Владислав Ховалыг Начын Монгуш биле Бады-Маадыр Самданның Тываже чанып келири билек байырын чедирип, улуг маргылдаага регионну төлептиг төлээлээни дээш өөрүп четтиргенин илереткен. А Начын Монгушту төрүттүнген хүнү-биле база байыр чедирген. Ол хүн спортчу 25 харлаан. Хүлер медальдың эдилекчизи Чаян Монгуш Красноярск хоорайга эмчи шинчилгези эртип артып калган.
Оолдарны «Олимп» олимпийжи курлавыр школазының тренерлер башкылары Владимир Түлүш биле Алибек Хомушку оолдарны үдеп чорааннар.
Тываның Баштыңы бүгү Тываның спортчу ниитилелинге оолдарның спортчу чедиишкиннери улуг ужур-уткалыг болганын демдеглээн. Тиилекчилерни болгаш оларның дагдыныкчыларын дарый шаңнап-мактаар даалганы ол республиканың Спорт яамызынга берген.
«Бистиң мөгелеривис күш-шыдалы бедик деңнелде турда, бүгү күжүн аргалыг-ла болза спортчу карьеразынче угландырар ужурлуг. Бажың азы гараж тудуун доозары дээн ышкаш, хүннүң айтырыглары оларны дүвүретпес ужурлуг» – деп, Тываның Баштыңы демдеглээн.
Кубоктуң чемпиону Начын Монгуштуң тренери Алибек Хомушку оолдар маргылдаага шыңгыы белеткенген болгаш, чедиишкинге бүзүреп турганын чугаалаан. «Кайы хире күш үндүргениңерден, дүжүдүңер түңнели көстүп келир. Ынчалза-даа тиилелгеже семевээн бис. Бүдүн республика Начынывыс дээш аарып турарын билир болгаш, чонувусту өөртүрү – эң кол чүүл турду» - деп, ол чугаалаан.
Индирден дүшпейн тура-ла, дараазында улуг маргылдааларны бодап эгелээнин Начын Монгуш үлешкен. А ооң эжи Бады-Маадыр Самдан хүреш мурнунда берттине берген турган болгаш, чедиишкинниг хүрежиринге бүзүревейн турганын чугаалаан. Тыва мөгелер колдуунда-ла чиик болгаш ортумак деңзиге күжүн шенежир болгаш, 97 кил чедир деңзиге мөңгүн медальды чаалап алганы езулуг ажыдыышкын болган.
Апрельде Братиславага болуп эртер Европаның хостуг хүреш чемпионадынга амдыгааштан сагыш-сеткили-биле белеткенип эгелээн мөге оолдарның шиитпирлиг тура-соруун Тываның Баштыңы бодунуң блогунда демдеглээн. Бо неделяда олар чурттуң чыынды командазы-биле белеткел чыыштарынче аъттаныптарлар.
Ужуражылга үезинде спортчуларның моон соңгааргы белеткелинге, аңгы-аңгы маргылдааларга болгаш белеткел чыыштарынче тренерлери-биле кады чорууру дээн ышкаш, өске-даа айтырыгларны сайгарган. Оон аңгыда Кызылда олимпийжи курлавырлар школазының баазазынга школа-интернатты ажыдарын база чугаалашкан.
Регионнуң спорт сайыды Субудай Монгуш школа-интернат бүдүн республиканың булуңнарындан хүрештиң хевирлеринге оолдар, уругларны хаара тудуп, аңгы-аңгы деңнелдиг маргылдааларга оларны белеткээр тускай чер апаарын чугаалаан.
Субудай Монгуш регионда спортту хөгжүдеринге улуг деткимчези дээш, республиканың удуртулгазынга өөрүп четтиргенин илереткен. Каш чыл бурунгаар эгелээн ажыл үре-түңнелдерни эккеп эгелээнин ол демдеглээн. «Чаа олимпийжи үе-чада эгелээн, бистиң спортчуларывысты херек чүүлдер-биле хандырып, белеткениринге таарымчалыг байдалдарны тургузар дээш, бүгү-ле чүвени кылыр бис» – деп, С. Монгуш демдеглээн.
Тыва спортчу Опан Сат Ярыгин маргылдаазынга шагда-ла тиилээнин сагындыраал. Ол чүүл 2013 чылда болган, спортчу ол үеде чурттап, белеткенип турганы Красноярск хоорайны төлээлеп киришкен. Бо удаада мөгелер төрээн республиказының өмүнээзинден хүрешкеннер – ол чүүл тус черниң тренерлериниң деңнелиниң көскүзү-биле бедээнин, ол ышкаш регионда спортту хөгжүдер дээш кылдынган ажылдары херечилеп турар.