Тываның күрүне университединиң ректору Ольга Хомушку республиканың Баштыңы Владислав Ховалыгның Дээди Хуралга Айыткалының соонда, бодалдары-биле үлешкен. Регион удуртукчузунуң илеткели ону хей-аът кииргенин база университетке чаа угланыышкыннарны айытканын, ректор демдеглээн.
«Айыткалды дыка сонуургадым - деп, Ольга Хомушку чугаалаан. - Ол билдингир, тода болгаш чедингир-дир. Келир үеже чүгле сорулгаларны айыткан эвес, а шимчээшкинниң шын угланыышкынын бээр түңнелдерни үндүргени чугула болду».
Ректор республикада улуг экономиктиг төлевилелдерни боттандырарынга хамаарышкан Айыткалдың талазынче онза кичээнгейни угландырган. Ооң бодалы-биле алырга, бо эгелээшкиннер университетке кады ажылдажылгага болгаш бурунгаар хөгжүлдеге улуг аргаларны ажыдып турар.
«Бо төлевилелдерниң күүселдези-биле инженер кадрларны белеткээри чугула сорулга болур дээрзин дыңнаары меңээ дыка чугула болду - деп, Ольга Хомушку тайылбырлаан. – Тываның күрүне университединге, Өөредилге яамызы болгаш өске-даа партнерлар-биле кады, ол талазы-биле ажылды күштелдирер даалга салдынган. 2024 чылда-ла Эльбрусметалл-Литий болгаш Ростех дээн ышкаш компаниялар-биле кады ажылдажылганы эгелээн бис, ол ажыл албан уламчылаар».
Хомушку университет чүгле тус черниң инвесторлары-биле эвес, а чурттуң эң улуг дээди өөредилге черлери-биле чедимчелиг кады эштежилгени тургузуп шыдаарынга бүзүрелин илереткен. «Бо чүүл биске дыка солун перспективаларны ажыдып, чугула болгаш кол сорулгаларны салып турар» - деп, ол түңнээн.