Тыва Республиканың Хөй-ниити палатазының даргазы Алесия Бажина Тываның Баштыңы Владислав Ховалыгның Тываның Дээди Хуралының (парламентизиниң) депутаттарынга болгаш чонга таныштырган Айыткалынга хамаарыштыр бодалдарын үлешкен:
«Бир дугаарында, илеткел бистиң хамаатыларывыс дээш ханы сагыш човаашкынныг болганын демдеглексеп тур мен - деп, ол чугаалаан. – Баштың регионнуң хөгжүлдезинче угланган национал төлевилелдерни боттандырары чугула дээрзин айыткан. Тускай шериг операциязы болгаш ооң киржикчилери улуг кичээнгейде, оларга чүгле өөрүп четтиргенивисти илередир эвес, а Төрээн чуртувусту камгалап турар ол маадырларны – бистиң шериг албанныгларывысты болгаш оларның өг-бүлелерин деткиир хүлээлгелиг бис. Бо дыка чугула. Президентиниң чуртта-даа, Баштыңывыстың республикада-даа чарлааны Ада-чурт камгалакчызының чылын шын деп санаар-дыр мен».
Бажинаның бодалы-биле алырга, бо чылда планнаттынган шупту хемчеглер болгаш эгелээшкиннер шериглерни деткииринче угланган болур ужурлуг.
Хөй-ниити палатазының даргазы агроүлетпүр комплекизин база өөредилге системазын хөгжүдериниң айтырыгларынче онза кичээнгей угланганын база демдеглээн.
Ол математика болгаш инженерлиг угланыышкыннарны сайзырадырынга хамаарышкан чаа өөредилге эгелээшкиннериниң чугулазын демдеглээн: «Бистиң ажы-төлүвүс келир үеде бедик технологиялыг адырларга ажылдаарынга дузалыг билиглерни алыры чугула. Бистиң ажы-төлүвүс бедик индустрияны сайзыраңгайжыдыптар специалистер болур ужурлуг» -деп, Бажина демдеглээн.