ТР-ниң Дээди Хуралының (парламентизиниң) Даргазының оралакчызы Андрей Листков Тываның Баштыңы Владислав Ховалыгның депутаттарга дамчыткан амгы Айыткалының бүгү чүвени хаара туткан шынарын демдеглээн.
- Айыткал Тываның үш чылда чедип алган бүгү чүүлдеривистиң хөгжүлдезиниң шупту талаларын хаара туткан. Бүзүрел-биле алызында кылыр эки ажылдарны база ында көрген деп, Листков Айыткал езулалының соонда бодалын үлешкен.
Регионнуң баштыңы «Ростех» компанияның удуртукчузу-биле чарган дугуржулгага онза кичээнгейни салган дээрзин ол демдеглээн. Листков Тываның хөгжүлдезинге ийи кол төлевилел – литий чыдынын база Ак-Суг алдын-порфир чыдынын боттандырары улуг салдарлыг болурунга бүзүрелдиг. Олар чүгле чаа инфраструктураны тургузуп, энергетика болгаш үлетпүрнү хөгжүдер эвес, а республикада өөредилгениң деңнелин бедидер болгаш тус черниң специалистериниң мергежилин бедидер инженер-техниктиг кадрларны негээр. Бо чүүл, бодунуң ээлчээнде, көдээ ажыл-агыйның болгаш өске-даа адырларның хөгжүлдезинге идигни бээр.
Парламентиниң вице-спикери ол төлевилелдерниң күүселдези регионга үндүрүг орулгаларының элээн көвүдедип, ооң моон соңгаар хөгжүлдезинге таарымчалыг байдалдарны тургузарын база онзалап демдеглээн. Даг ажылы херээ чурттуң чечектелиишкининиң үндезини апарган Швейцария ышкаш, Тыва база шак-ла ындыг орукту эртип болурун деңнээн.
Листков күрүне деткимчезиниң, ооң иштинде көдээ ажыл-агыйга субсидияларның чугулазын онзалап демдеглээш, ооң ачызында кижилер амыдырал-чуртталгазының байдалын экижидер аргалыг болурун, регионнуң хөгжүлдезинге сонуургал улгадырын демдеглээн.