Тываның Баштыңы Владислав Ховалыг Абакан гарнизонунда РФ-тиң Истелге комитединиң шериг истелге килдизиниң баштыңы Аркадий Ултургашев-биле ужурашкан. Кызылда бактааттынган 55-ки гвардейжи бригаданың девискээринге болган болуушкуннуң Интернет четкиде тарап нептерээн видеокадрынга хамаарыштыр истелге - чугааның кол темазы болган.
Кадрларда шериг албанныгларны электрошокер ажыглап каржызы-биле эттеп турарын көргүскенин сагындыраал. Информастыг шөлге ук бижидилге көстүп кээри билек, Тываның Баштыңы Владислав Ховалыг харыысалгалыг удуртукчулар - ТШО айтырыгларның талазы-биле тускай төлээзи Тимур Кууларга база вице-премьер Айдыс Сынаага ол болуушкуннуң истелгезин контрольга алыр даалганы берген. Шериг прокуратуразы база шериг-истелге комитединиң оперативтиг истелге бөлүү истеп эгелээн.
Тыва Республикада бактааттынган шериг кезээниң шериг албанныгларынга удур күш дөгээн кижини туткаш, хоругдаанын Төп шериг округунуң парлалга албаны дыңнаткан. Болган болуушкунну бүгү талазындан истээри база буруулуг кижилерни харыысалгага онаары-биле Камгалал яамызындан комиссия корум-чурум камгалаар органнар-биле кады ажылдап турар.
«Кеземче херээн оттурган. Истелге видеода “маадыр” апарган шериг полициязының ажылдакчызының хоойлуга удур хөделиишкиннеринден ооң мурнунда когараан кижилер бар бе дээрзин база истеп илередир – деп, Тываның Баштыңы Владислав Ховалыг Россияның Истелге комитединиң Абакан гарнизонунда шериг истелге килдизиниң удуртукчузу Аркадий Ултургашев-биле ужурашканының соонда дыңнаткан. – Чаңгыс чер чурттугларга мону дыңнадыксадым. Шериг албаны-биле холбашкан кандыг-даа хоойлуга удур херектерни шериг истелге органнарынга дыңнадып болур. Кызылда участок дараазында адресте: Комсомольская кудумчузу, б. 4. Чөпшээрел чокка шериг кезектеринден үнгеннерниң даңзызынче киргени-биле холбашкан хомудалдар азы акша-хөреңги төлевиреринге хамаарышкан айтырыглар хөйү-биле тургустунуп турарын база билир мен».
Ылаңгыя, амгы үеде Абаканның шериг кезээ-биле керээ чарган чамдык кижилерден дыңнадыглар дугайында чугаалар чоруп турар. Владислав Ховалыг Абакан гарнизонунуң килдизинге хамааржыр өске-даа чугула айтырыгларны РФ-тиң Истелге комитединиң шериг истелге килдизиниң баштыңы-биле сайгарган. Тываның Баштыңы ис чок читкен шериг албанныгларны дилээр ажылда кады ажылдажылганың онза чугулазын айтып, «Ада-чурт камгалакчылары» күрүне фондузу-биле ажылдың чаа чурумун тургусканы амгы ажыл-чорудулганы элээн дүргедеткенин демдеглээн.