Камбы-Ламы эргелелиниң ламалары, Тываның Улусчу фронтузунуң төлээлери база Тыва культура төвүнүң артистери ТШО киржикчилеринге гуманитарлыг дузаламчыны чыыр дээш Тываның кожууннарын эргип турар. Чыгдынган чүъктү “Деткимче” фондузунуң дузазы-биле мурнуку шугумда тулчуп турар чаңгыс чер чурттугларывысче Шагаа бүдүүзүнде чорудар. Сарыг шажынның ай санаашкыны-биле Тывага Чаа чылды март 1-де демдеглээрин сагындыраал.
Тываның Улусчу фронтузунуң деткимчези база Тываның Чазааның дүүштүрүлгези-биле дузаны чыып турар. Тывада азербайджан болгаш армян диаспоралар Тыва үндезин культура төвүнге база Камбы-Лама эргелелинге кожууннарже үнүүшкүннерге дээш кывар-чаар материалдарны база гуманитарлыг дузага кадып алыр кылдыр акшаны дамчыткан. Кожууннарже үнүүшкүннер үезинде хоорай, суурларның чурттакчылары-биле кады гуманитарлыг дузаны чыырындан аңгыда, Камбы-Лама эргелелиниң ламалары Шагаа бүдүүзүнүң мөргүлдерин база лекцияларын номчуп, “Тыва” ансамблиниң артистери концерттерни көргүзер.
Бо удаада гуманитарлыг чүъктү Курск база Запорожье областарда Тывадан ТШО киржикчилеринге чедирер, ол угланыышкынче эмнерни, транспортту, генераторларны, чылыдар херекселдерни, дериг-херекселдерни, тепловизорларны, рацияларны, коптерларны, дүне көөр херекселдерни, ол ышкаш дайынчыларның боттарының чагааны чугула херек техниктиг дериг-херекселдерни чорудар.
Улусчу фронтунуң регионалдыг күүскомунуң удуртукчузу Саима Далчинның чугаалааны болза, дайынчыларның чагыгларын боттарының аттарынга дамчыдып бээр дээш, акшаны ынчаар чыыры кол. Күзелдиг кижи бүрүзү Шагаа бүдүүзүнде бистиң дайынчыларывыска дээш гуманитарлыг дуза чыылдазынга бодунуң үлүүн киириштирип болур. А бистиң дайынчыларывыска техниктиг дериг-херекселдерни боттары садып бериксеп турар кижилер бар болза, техника аймаа кандыг шериг негелделерге дүгжүп турарын 8(39422) 2-10-50 телефон дамчыштыр сүмележип алыры чугула. Гуманитарлыг дуза чыылдазын дараазында адресте доктаамал чыылда пунктузунда хүлээп турар: Кызыл хоорай, Тыва эки турачылар кудумчузу 3, Улусчу фронтузунуң регионалдыг күүскомунда база Цеченлинг хүрээде.
Россияның буддистер ассамблеязының Кызылда волонтерлары база шажын ажылдакчылары тускай шериг операциязының эгелээнден деткимчени чорудуп турар. Ооң мурнунда фронтуже автомашинаны, мотоциклдерни, аргаан чаштынар четкилерни, дайынчыларга херек чүүлдерни чорутканын сагындыраал. Тываның Камбы-лама эргелелиниң төлээлери тускай шериг операциязының зоназынга четкеш, февральдың 28-тен март 1-ге чедир Тывадан болгаш өске-даа регионнардан дайынчыларга мөргүл номчулгаларын эрттирер.