Владислав Ховалыг Моолдуң Кызылда чиңгине консулу чораан Чимид Ганболдка Россия биле Моолдуң аразында харылзааларны хөгжүдеринге киирген үлүг-хуузу дээш өөрүп четтиргенин илереткеш, моон-даа соңгаар чедиишкиннерни күзээн. Ганболд Моолдуң Чазааның доктаалы езугаар 2019 чылдың ноябрьдан эгелеп ажылдап чораан албан-дужаалын соксаткан.
Дээрги Ганболдтуң ажылдап чораан үезинде, Тыва биле Моолдуң кызыгаар аймактарының аразында садыг-экономиктиг кады ажылдажылганың деңнелин элээн бедидер болгаш культура-социал харылзааларны быжыглаар аргалыг болганын регионнуң баштыңы бодунуң блогунда демдеглээн. Ковид-19 пандемиязының нарын үеде безин ийи таланың харылзааларны хөгжүдер талазы-биле улуг ажыл чоруттунган. Россиядан Тыва таварты Моол болгаш Кыдатче автомобиль болгаш демир-орук коридорларын тургузары-биле улуг хемчээлдиг төлевилелди боттандырарынга белеткелди эгелээни – кады чедип алган чедиишкиннериниң бирээзи болур.
Дээрги Чимид Ганболдтуң болгаш консулдуг команданың идепкейлиг ажылы-биле Моолдуң дээди удуртулгазы-биле кол инфраструктура айтырыгларын шиитпирлээринче угланган чугула чугаалажыышкыннар эрткен. Күрүнелер аразында кады ажылдажылганы улам хөгжүдеринге идиглиг быжыг харылзаалар тургустунган.
Келир үеде профессионал планнарының дугайында чугаалап тура, Хандагайты – Боршоо деп хөй талалыг эрттирилге пунктузун ажыдарынга хамаарышкан кады төлевилелдерге улаштыр киржирин дээрги Ганболд чугаалаан.
Россия Федерациязының Даштыкы херектер яамызының саналдааны-биле, 2001 чылдың ноябрьда Кызылда Моолдуң чиңгине консул чери ажыттынган. Консул округунга Тыва Республика, Алтай Республика, Хакас Республика база Алтай край кирип турар.