Тываның Баштыңы Владислав Ховалыг «Шаман» деп кинону таныштырар дээш Кызылда келген алдар-аттыг актёр Амаду Мамадаков-биле ужурашкан. Чурттуң шупту кинотеатрларынга кинону январьның 16-да үндүрүп эгелээр, кол рольдарның бирээзин ойнаан Мамадаковтуң киришкени кинону Тываның чурттакчылары премьера хүнүнүң бүдүүзүнде көөр аргалыг болганы онза.
Владислав Ховалыг Сибирьниң регионнарындан болгаш Тывадан төлээлер идепкейлиг киришкен чаа фильмни "ёзулуг-ла сибирьжи кино" деп демдеглээн. Кинода өзек кол рольдарның бирээзин Тываның алдарлыг артизи Ляна Ондур ойнаан.
Режиссёр Михаил Мерзликин база продюсер Владислав Кафеев баштаан кинематография делегациязы-биле ужурашкаш, Тываның Баштыңы киноиндустрияның хөгжүлдезинге Сибирьниң улуг курлавырын демдеглээн. Кино тырттырарынга ооң бойдус чурумалы кайгамчык шөл бооп турар деп айыткан.
Владислав Ховалыг бодунуң хууда блогунга Амаду Мамадаков-биле чылыг харылзааны тудуп турарын үлешкен. Актёр ТШО-да бистиң дайынчыларывыска дузалажып, госпитальдарга чедип, Москвада «Et Cetera» театрда болуп турар бодунуң шиилеринче чаңгыс чер чурттугларны чалаары чаңчыл апарган.
Мамадаков кожа регионнарның турисчи курлавырын элээн калбартыр ужурлуг Кош-Агач биле Мөңгүн-Тайга аразының оруун тудар Тываның транспорт төлевилелин сонуургаан. Ол социал-культурлуг кады ажылдажылгага эки идигни бээр деп бодалын илереткен.
«Октябрьда ол угланыышкынны көрүп чордум деп чугаалаан мен. Ол перспективтиг планда бар. Бо чылын кыдыг-кызыгаар Мөңгүн-Тайгаже орукту септээрин уламчылап, Мугур-Аксы суурнуң чамдык төп кудумчуларын чаагайжыдар бис» - деп, Владислав Ховалыг чугаалаан.
«Найырал» кинотеатрга «Шаман» деп кинонуң баштайгы көргүзүглери ам эгелээр. Кинону көөрүнден аңгыда, көрүкчүлер Амаду Мамадаковтуң боду-биле ужуражып, ооң чогаадыкчы ажыл планнарын сонуургап, чаа кинога хамааржыр айтырыгларны салып болур.
Амаду Мамадаков – «Звезда» деп кинода база «Солдаты» деп сериалда рольдары-биле ады-сураа билдингир апарган российжи актёр. Ол «Алтай Республиканың алдарлыг артизи» база «Тыва Республиканың алдарлыг артизи» аттарның эдилекчизи. Бо чоокку үеде, Россияның Маадыры Мерген Донгактың овур-хевирин ойнаан чаа төлевилелге ажылдап эгелээр. Ону Красноярск крайның, Тываның база Хакасияның девискээрлеринге 2025 чылда тырттырып эгелээри көрдүнген.